AMAFOTO: APR FC isezeye Rusheshangoga yegukana igikombe cy’Amahoro 2017

Ibyishimo bivanze n’amarira byasaze ibihumbi abakunzi ba APR FC kuko begukanya igikombe cy’Amahoro batsinze Espoir FC 1-0 mu mukino wa nyuma. Gusa wari umukino wo gusezera Michel Rusheshangoga wayikiniye kuva 2012, kuko yerekeje muri Singida United yo muri Tanzania.

Kuri uyu wa kabiri tariki 4 Nyakanga 2017 (ku munsi wo kwibohora) nibwo hakinwe umukino wa nyuma w’igikombe cy’Amahoro. Espoir FC y’i Rusizi yakoze amateka yo gusezereye Rayon Sports muri ½ yagombaga kwisobanura na APR FC Intare yakomeretse kuko yatwawe igikombe cya shampiyona y’uyu mwaka.

Iyi kipe y’Ingabo z’igihugu yatangiye isatirana inyota yo gufungura amaze mu minota yak are. Byashobokaga ku munota wa kabiri kuko yabonye coup franc ku ikosa ryari rikorewe kuri Muhadjiri Hakizimana, gusa Isingizwe Patrick urindira Espoir FC arawufata.

Gusatira kwa APR FC kwatumye Espoir FC itangira gukora amakosa, ku munota wa 14 umusifuzi Hakizimana Louis wayoboye uyu mukino atanga ikarita ya mbere y’umuhondo kuri Wilondja Albert wari akoreye ikosa kuri Rusheshangoga.

Abasore ba Jimmy Ndizeye umurundi utoza Espoir bagaragazaga igihunga mu minota ya mbere byanahesheje APR FC igitego ku munota wa 38 ubwo Hakundukize Adolphe yageragezaga gukiza izamu ariko umupira awuha Bizimana Djihad wari imbere y’izamu, wahise arifungura bitamugoye. Igice cya mbere cyarangiye ari 1-0.

Mu gice cya kabiri umutoza wa Espoir FC Ndizeye Jimmy yakoze impinduka ebyiri agamije kongera imbaraga mu busatirizi ngo ashake igitego cyo kwishyura yinjiza Habyarimana Faustin wafashe umwanya wa Wilondja Albert naho Hakundukize Adolphe witsinze asimburwa na Bugingo Samson.

Ku rundi ruhande APR FC nayo yakomezaga gukaza umurego ibifashijwemo n’abakinnyi bay obo hagati Bizimana Djihad na Muhadjiri Hakizimana.

Jimmy Mulisa washakaga igitego cya kabiri cyari kumwizera igikombe kare yasimbuje inshuro eshatu mu gice cya kabiri; Issa Bigirimana asimburwa na Maxime Sekamana, Tuyishime Eric asimbura Imran Nshimiyimana naho Twizerimana Onesme afata umwanya wa Innocent Nshuti.

Aya maraso mashya yashyize Espoir FC ku gitutu kuko itashoboye kugera imbere y’izamu rya Kimenyi Yves inshuro nyinshi mu gice cya kabiri. Umukino warangiye ku ntsinzi ya APR FC.

Abakunzi ba APR FC bari kuri stade Regional ya Kigali barangajwe imbere n’itsinda ryotwa ‘Intare za APR FC’ bari baririmbaga indirimbo zo gusezera Michel Rusheshangoga wari umaze imyaka itanu mu ikipe yabo ariko wamaze gusinya imyaka ibiri muri Singida United yo muri Tanzania.

Aba bafana bamuhaye impano zitandukanye zirimo ibitambaro biriho ubutumwa bumushimira kandi bumwifuriza ishya n’ihirwe mu ikipe nshya azatangiramo akazi mu kwezi gutaha.

APR FC yegukanye igikombe yatahanye miliyoni 10 z’amafaranga y’u Rwanda n’igikombe, Espoir FC yatsindiwe ku mukino wa nyuma ihabwa miliyoni eshatu mu gihe Rayon Sports yatsinze Amagaju FC 3-0 mu mukino wo guhatanira umwanya wa gatatu itahana miliyoni ebyiri.

Abakinnyi 11 babanje mu kibuga ku mpande zombi:

APR FC: Kimenyi Yves, Ngabo Albert, Nsabimana Aimable, Rusheshangoga Michel, Imanishimwe Emmanuel,Nshimiyimana Imran, Mukunzi Yannick, Bizimana Djihad, Bigirimana Issa, Muhadjili Hakizimana , Nshuti Innocent

Espoir FC: Isingizwe Patrick, Mutunzi Clement, Wa Losambo Moninga, Mbogo Ally, Wilondja Jacques, Dushimumugenzi Jean, Nkurunziza Felcien, Bainla Bao, Renzaho Hussein, Murungura Wilondja Albert, Bakundukize Adolphe

Photo: R.Ngabo/UM– USEKE

Roben NGABO

UM– USEKE