APR FC idafite Issa Bigirimana iratangira gushaka igikombe cy’Amahoro

Nyuma yo kutitwara neza muri shampiyona y’uyu mwaka APR FC igiye gutangira urugendo rwo gushaka igikombe cy’Amahoro ikina na Vision FC kuri uyu wa kabiri ku Umumena. Irakina idafite bamwe mu bakinnyi  babanzamo nka Issa Bigirimana.

Ikipe y’ingabo z’u Rwanda APR FC ntabwo yorohewe na shampiyona y’u Rwanda ‘AZAM Rwanda Premier League’ uyu mwaka, kuko irushwa na Rayon sports amanota umunani (Rayon ifite ikirarane).

Gusa nyuma yo kumara imikino myinshi idatsinda muri Gashyantare na Werurwe, yatangiye neza Mata kuko yatsinze imikino ibiri iheruka yanakiniye hanze ya Kigali (Etincelles FC na Sunrise FC).

APR FC iratangira gukina igikombe cy’Amahoro ibura bamwe mu bakinnyi bayo basanzwe babanzamo nka; Nsabimana Aimable wavunikiye i Nyagatare, na Issa Bigirimana urusha abandi ibitego byinshi (6) muri APR FC wahagaritswe n’ikipe ye igihe kitazwi ashinjwa imyitwarire mibi (irimo guta akazi akajya i Burundi atasabye uruhushya.

Abakunzi b’iyi kipe ariko barishimira kugaruka mu kibuga kuri Emmanuel Imanishimwe wari waravunitse atangira mu mukino wa mbere w’igikombe cy’Amahoro bifuza gutwara nyuma yo gutsindirwa ku mukino wa nyuma umwaka ushize 2016.

Uyu mukino utangira saa 15:30 kuri stade Umumena urabanzirizwa n’uhuza Esperance SK na Espoir FC. Yombi iranyura kuri AZAM TV.

Imikino iteganyijwe mu gikombe cy’Amahoro

Kuwa Kabiri, tariki ya 18 Mata 2017

• Vision Fc vs APR Fc (Mumena, 15:30)
• Esperance SK vs Espoir Fc (Mumena, 13:00)
• Pepiniere Fc vs Marines Fc (Ruyenzi, 15:30)
• Musanze Fc vs Isonga Fc (Musanze, 15:30)

Kuwa Gatatu, tariki ya 19 Mata 2017

• Rugende vs Rayon Sports (Stade de Kigali, 15:30)
• Heroes Fc vs AS Kigali (Kicukiro, 15:30)
• Etoile de l’est vs SC Kiyovu (Ngoma, 15:30)
• Akagera Fc vs Amagaju Fc (Rwinkwavu, 15:30)
• Vision JN vs AS Muhanga (Rubavu, 15:30)
• Miroplast Fc vs Gicumbi Fc (Stade Mironko, 15:30)
• United Stars Fc vs Police Fc (Kabagari, 15:30)
• Hope Fc vs Bugesera Fc (Rutsiro, 15:30)
• Aspor Fc vs La Jeunesse Fc (Kicukiro, 13:00)
• Kirehe Fc vs Etincelles Fc (Kirehe, 15:30)
• Intare Fc vs Mukura VS (Kamena, 15:30)
• Rwamagana City Fc vs Sunrise Fc (Rwamagana, 15:30)

Imikino yo kwishyura iteganyijwe tariki 25 na 26 Mata 2017.

Roben NGABO

UM– USEKE