Andy Bumuntu umunyempano mushya mu muziki

Andy Bumuntu ni umuhanzi umaze gukora indirimbo imwe gusa yise ‘Ndashaje’. Ni umuvandimwe wa Umutare Gaby kuko amukurikira bwa kabiri. Iyo ndirimbo ubu ni imwe mu ndirimbo irimo kuvugwa cyane kubera ijwi n’ubuhanga bw’uyu muhanzi.

Ubu niwe muhanzi ukora injyana adafite uwo bayihuriyeho mu Rwanda ya (Blues traditionnel). Imwe mu njyana ikundwa n’abantu bazi umuziki kuko uyiririmba bimusaba kuba azi kuririmba by’umwimerere ‘live’.

Kubera kubura aho ahera ngo amenyekanishe ibihangano bye, ubu aririmba mu ma Karaoke yo mu tubari hirya no hino mu Mujyi wa Kigali.

Gusa ngo isaha n’isaha ashobora kuzagera ku nzozi ze zo kumenyakana nk’umunyamuziki atari ukumenyekana nk’umuhanzi uririmba mu tubari gusa kuko yizera ko impano itajya izimira.

Abona umuziki w’u Rwanda ugoye kuba wagira amahirwe yo kuwinjiramo ngo uhite umenyekana. Kuko amaze igihe akurikirana benshi mu bahanzi b’abahanga ariko batamanyekana nkuko byagakwiye.

Andy Bumuntu watangiye gukorana na Producer Bob, yabwiye Umuseke ko ubutumwa yabonye akimaraga gukora indirimbo ye ya mbere itaranagira amashusho, byamuhaye kwitekerezaho.

Ati “Uko mbona umuziki w’u Rwanda uhagaze, ntibyoroshye kuba waza ugahita umenyekana. Ahubwo bisaba kubanza ukitonda ukamenya icyo abanyarwanda bagushakaho nk’umuhanzi uje uri mushya. Aribyo ubu ndimo kubanza kwitondera”.

Akomeza avuga ko nubwo hari abamusuzugurira kuba aririmba mu tubari, ariko kuri we ni umwanya mwiza wo gukoresha ijwi rye no kuba hari ubundi buhanga avanamo kubera gusubiramo indirimbo z’abandi bahanzi b’abahanga batandukanye.

Joel Rutaganda

UM– USEKE.RW