Amavubi y'abagore yatsinze Kenya igitego 1-0

Ikipe y’u Rwanda y’abagore  yaraye itsinze  ikipe y’igihugu ya  Kenya igitego kimwe ku busa mu mukino wabereye kuri Sitade ya Kigali iherereye i Nyamirambo.

Umukinnyi Niyoyita Alice niwe wafunguye amazamu ya Kenya ku munota wa 38 w’igice cya mbere. Amavubi y’abagore yakomeje gusatira kandi yahushije ibitego mu buryo bugaragara.

Kuri uyu mukino kwinjira byari ubuntu kandi wari witabiriwe n’abantu benshi .

Umunyamakuru wacu yaganiriye n’umutoza w’ikipe y’igihugu y’abagore  awutangariza  ibanga ry’iyi ntsinzi.

Umutoza Nyinawumuntu Grace yagize  ati “Nyuma y’uko dusanze mu Rwanda nta kipe y’abagore  dufite ndetse andi akaba yari yarasenyutse guhera muri 2009, twafashe akanya  dutegura ikipe y’igihugu y’abagore. Jyewe natangiye ntoza ikipe ya AS Kigali sinari nzi ko nshobora kuba umutoza w’ikipe y’igihugu ariko nateguraga ikipe nzi neza ko izagera kure kandi bikazafasha n’undi mutoza uzaza nyuma yanjye.”

Uyu mutoza yabwiye UM– USEKE ko nubwo batsinze igitego kimwe ariko bidahagije ahubwo bagiye kongeera imyitozo kugira ngo bazatsinde ibindi bitego  byinshi mu mukino wo kwishyura uzabera i Nairobi muri  Kenya ku italiki ya 02, Werurwe, 2014.

Damas NKOTANYI

ububiko.umusekehost.com