Amashashi REMA yayahagurukiye…Uyafatanywe aracibwa agera kuri 300 000 Frw

*Amashashi yitwa ‘Cling Films’ yo mu bitaro, hotels,… ngo ab’imigati bayagize ayabo…

Kuri uyu wa 13 Mutarama, Ikigo cy’Igihugu gishinzwe kubungabunga ibidukikije cyaramukiye mu mukwabu wo gushakisha abakomeje gukoresha amasashi  ya pulasitiki mu turere twose tw’u Rwanda, rimwe mu matsinda ari muri iki gikorwa mu mujyi wa Kigali wafashe abantu bane bafite inzu zikorerwamo imigati (Bakeries) baciwe amande y’ibihumbi 300 Frw kuri buri muntu.

Mu mwaka wa 2008, Leta y’u Rwanda yasohoye itegeko ribuza ikorwa, itumizwa, ikoreshwa n’icuruzwa ry’amasashi akoze muri pulasitiki.

Iri tegeko rinagena n’ibihano ku warirezeho birimo igifungo kiva ku mezi atandatu kugeza ku mwaka n’ihazabu iva ku bihumbi 100 kugera ku bihumbi 500 Frw cyangwa kimwe muri byo ku bakora cyangwa abakoresha aya masashi.

Ugurisha  aya masashi we ahanishwa kuva ku ihazabu y’ibihumbi 10 kugera ku bihumbi 300 Frw, naho umuntu wese utabyemerewe ukoresha aya masashi  ahanishwa ihazabu iri hagati y’ibihumbi 5 n’ibihumbi 100.

Ikigo cy’igihugu gishinzwe kubungabunga ibidukikije, REMA cyaramukiye mu gikorwa cyo kurandura ikoreshwa ry’aya mashi, mu murenge wa Muhima cyafashe abantu batatu n’undi umwe wo mu murenge wa Jali bafite amazu atunganya imigati (Bakeries) bapfunyika mu masashi atemewe gukoresha ibi bikorwa.

Aba bantu bose bafatanywe aya masashi azwi nka Cling Film Plastic bavuga ko atandukanye n’ayaciwe ku buryo bayagura ahantu hazwi ndetse bagahabwa inyemezabwishyu.

Umukozi wa REMA mu ishami rishinzwe amategeko ajyanye n’ibidukikije no kubibungabunga, Samson Twiringire avuga ko abantu badakwiye kwitwaza ko aya masashi yemewe kuko n’ubwo yemewe kwinjizwa mu Rwanda ariko yagenewe gukoreshwa mu bitaro, mu mahoteri, no muri Restaurent.

Avuga ko impamvu aya masashi yakomorewe muri izi nzego ari uko zifite uburyo bwo kuyakusanya kugira ngo asubizwe mu nganda atunganywemo ibindi.

Ati “ Ariko iyo njye nje nk’umuguzi nkagura umugati, ya sashi nyijugunya muri nature akajya kwangiza ibidukikije nta buryo buba buriho bwo kugira ngo wa mucuruzi akurikirane ya masashi yagurishijemo imigati yongere ayafate ayakusanye ayajyane mu inaguriro.”

REMA ivuga ko muri 2012 yandikiye abafite Bakeries bose ko aya masashi ya ‘Cling Film’ batemerewe kuyapfunyikamo imigati, ikavuga ko yakajije ibihano ku bafatirwa muri iki cyuho kuko byaba bigaragaza ko bakomeje kwinangira.

Samson ati “ Itegeko rivuga ko aba bacibwa hagati y’ibihumbi 100 na 300, ubu twumvikanye ko tuzajya tubaca ibihumbi 300, itegeko rivuga ko iyo uvuze range (hagati ya…na ya…) ushobora kumuca minimum cyangwa maximum ariko noneho twaravuze tuti reka tujye tubaca 300.”

Avuga ko abafatwa bose bahita bafungirwa bagasabwa kujya kwishyura aya mande, ubundi bakandika ibaruha igaragaza ko batazasubira, ubundi bagafungurirwa bagakomeza imirimo yabo.

Abafashwe n’itsinda uyu muyobozi muri REMA yakoreyemo bose bavuga ko bari bazi ko aya masashe (cling films) yemewe gusa bakigarura bavuga ko ubwo basanze bitemewe bagiye guca ukubiri no kuyakoresha.

Emile Mugabo ukorera uruganda rw’imigati rwitwa Ikaze ruherereye mu kagari ka Gateko, mu murenge wa Jali yagize ati “ Igihano turacyakira bisanzwe ariko ntabwo twashatse kurenga ku itegeko kuko twayaguraga tuzi ko yemewe.”

Mugabo avuga ko aya masashe anakundwa n’abakiliya babo kuko bajya bananga gupfunyikirwa mu bipfunyika by’impapuro, akavuga ko bagiye kujya bakoresha izi envelope zikoze mu bipapuro kuko byombi bigura kimwe.

Mu mukwabu nk’uyu uheruka gukorwa ku italiki ya 20 na 21 Ukuboza 2016, wasize hafashwe abantu 212 bakekwagaho gukoresha amasashe, hafatwa amasashe ibihumbi 435 afite ibilo 84. Abafatiwe muri iki gikorwa cyakozwe mu mpera z’umwaka dusoje baciwe amande angana na 4 565 000 Frw.

Martin NIYONKURU
UM– USEKE.RW