‘Amaboko hejuru’ imvugo y’abahanzi bari muri PGGSS5

Ku nshuro ya gatanu irushanwa rya Primus Guma Guma Super Star riba, ijambo abahanzi bose bakunda guhuriraho ni ‘Amaboko hejuru’. Rimwe na rimwe bikagaragara nkaho basaba ubufasha abo barimo kuririmbira kugirango abagize akanama nkemurampaka bashobore kuba amanita.

Ku ruhande rw’abakemurampaka bavuga ko iyo umuhanzi yashimishije abantu nta mpamvu n’imwe yo kuba yasaba ko bazamura amaboko mu gihe ariwe ubibasabye ataribo babyibwirije baba babibona.

Mu kiganiro giherutse kuba cyahuje abanyamakuru na bamwe mu bagize akanama nkemurampaka, Aimable Twahirwa yavuze ko byose baba babireba.

Ati “Umuhanzi washimishije abantu si uko bose basimbuka cyangwa ngo bamanike amaboko, oyaaaa!!!ahubwo ni uburyo banejejwe n’ibyo ubakoreye bo ubwabo bakagushimira.

Ikindi kintu badakunze kwitaho kandi gishobora kuba cyabahesha amanita cyangwa se kikayakwambura, ni igihe ibyuma bicecetse umuhanzi akaririmbisha abafana be bagasubiramo indirimbo ye bose.

Ariko aramutse nanone abikoze ntibasubiremo indirimbo ye bihita byorohereza abakemurampaka guhita babona amanita umuhanzi akwiye ako kanya hatabayeho kujijirirwa”.

Uretse n’abagize akanama nkemurampaka, na bamwe mu bakurikirana ibi bitaramo cyane usanga bavuga ko iryo jambo ari amatakira ngoyi y’umuhanzi ku bafana aba aririmbira.

Mu bahanzi 10 bose bahatanira uwakwegukana iri rushanwa, Bruce Melodie niwe muhanzi utaravuga iryo jambo kuva yatangira igitaramo cya mbere cyabereye i Rusizi mu Ntara y’Iburengerazuba.

Joel Rutaganda

UM– USEKE.RW