Ally Soudy yavuze kuri Salax Awards 2012 n'uko abayeho

Mu kiganiro twagiranye na Ally Soudy yagize icyo avuga kuri muzika nyarwanda ndetse na Salax Awards 2012, uyu munyamakuru, umushushabirori akaba n’umuhanzi yagize n’ibyo adutangariza ku buzima bwe.

Iki ni ikiganiro kirambuye twagiranye

Umuseke.com: Urabona ute Salax Awards 2012?   

Ally Soudy: Salax Awards ni kimwe mu bikorwa byagize uruhare runini mu kuzamura no gukundisha abantu umuziki nyarwanda  kuri njye n’uko nyibona,  nyibona nk’igikorwa cyakakwiye gushyigikirwa kikaguka kikaba cyarenga imbibi z‘u Rwanda. Mu ndoto zanjye harimo kuzabona abahanzi bava imihanda yose, mu bice bitandukanye bya Africa baza gufata ibihembo i Rwanda kandi numva bizaba, mbyiyumvamo kenshi!

Umuseke.com: Ni bande uha amahirwe? 

Ally Soudy: Sinakubwira ngo ndaha amahirwe kanaka cyangwa nde gusa ibikorwa nibaza ko abari mu Rwanda babizi kundusha babibona kandi erega iyo umuhanzi yakoze birenze abandi biba byigaragaza. Ibuka igihe cya King James, ba Rafiki bari bayoboye na ba Mako, Samputu, Miss Jojo, KGB,Tom Close, Massamba n’abandi benshi, gusa ikimbabaza nuko abenshi mu bahanzi nagiye nkunda bagiye baba ibihangage Salax awards itarabaho kuko bari kujya baziharira kabisa! Ariko nyine nta kundi aho iziye hari icyo nayo igomba kongeraho,reka turebe abazatsinda kandi bose mbifurije amahirwe!

Umuseke.com : Umugore wawe n’umwana bo bite?

Ally Soudy: Oh Carine araho cyane rwose ameze neza naho Ally Waris Umwiza yabaye inkumi azuzuza umwaka kuri 18 z’uku kwezi kwa kabiri  urumva ko abarambagiza baba bashakisha inka!

Umuseke.com: Ese muzika kuri ubu urayibona ku kihe kigero?

Ally Soudy: Ubu sinakubwira urwego muzika Nyarwanda  iriho kuko akenshi bigaragarira uri imbere mu gihugu, ariko nasize umuziki uri hejuru ya sectors hafi ya zose z’imyidagaduro mu Rwanda, kuko nasize abana n’abakuze basigaye bakunda muzika y’iwacu kurusha iy’amahanga abana barahinduye amazina bafata aya abastars b’abanyarwanda bakor muzika kandi buri wese indoto ari ukuzaba umunyamuziki, bitandukanye natwe tukiri abana twifuzaga kuzaba ba Gatete, Katauti, Aime Dollar, Billy Mbusa, Zapi, Pompidou, Bebe, Murangwa n’abandi benshi.

Umuseke.com: Wavuga iki kuri muzika ya Meddy na The Ben?

Ally Soudy : Meddy na The Ben icyo nabavugaho nuko ari abahanzi beza cyane kandi nkunda, mu byo mbakundira nuko batajya bacika intege kandi bashyira imbaraga mu buhanzi bwabo nawe reba uburyo basohora indirimbo nziza n’amashusho yazo kandi bari hanze y’igihugu! Barakora bakiga bagashaka n’uwo mwanya wo gushimisha abakunzi babo, nabasabira imigisha ivuye ku Mana bagatera imbere cyane wenda twazabona ibyamamare ku isi muri muzika bikomotse mu Rwagasabo gusa ibi mbisabira buri muhanzi wese ukomoka mu Rwanda cyangwa ukomoka ku Munyarwanda.

Umuseke.com: Ninde muhanzi ubona ufite ejo heza hazaza mu Rwanda?

Ally Soudy: Umuhanzi ufite akazoza mu Rwanda ni umuhanzi uzi icyo guhanga aricyo, uziko umuziki usaba kuwukunda no kuwitangira, uzi ko nyuma yo gukora indirimbo nziza kandi inogeye amatwi ya benshi hagakurikiraho kuyamamaza no kuyimenyekanisha hirya no hino, uziko kuririmbira u Rwanda gusa bidahagije ahubwo umuhanzi uramba ari umuhanzi uri mpuzamahanga, wicisha bugufi akemera indangagaciro za kimuntu, uziko umuziki ari business atari kuba star no kwiyangiza(Inzoga, amatabi y’ubwoko bwose, ubusambanyi n’ibindi), kandi ukunda u Rwanda, rwose uwo azamamara kandi uzabibona!

Umuseke.com: Wunva uzagaruka mu Rwanda ryari?

Ally Soudy : Nifuza kuba nagaruka mu Rwanda mu mpera z’uyu mwaka, gusa bizaterwa nuko bizaba byifashe, urabizi ko natangiye ubuzima bushya kandi n’akazi ngatangiye vuba, mbega ni ukubyitegura kuko biba bihenze binatewe kandi n’izindi nshingano umuntu aba afite zihariye, gusa nkumbuye byinshi mu Rwanda!Imana izambe hafi naho ubundi….

Umuseke.com:  Watangiye kwiga?

Ally Soudy: Ntago nari natangira kwiga ariko ubu namaze kugira connection n’amashuri atandukanye ndeba nibyo nsabwa kugira ngo nige, gusa niniga uyu mwaka bizansaba kwirihira kandi biba bihenze cyane ariko maze umwaka inaha kwiga byahita binyorohera kubera naba maze kuba neza umuturage wa USA bikaba byamfasha kubona scholarship cyangwa financial support, gusa ubu ubwo nabonye akazi ndimo kureba ko nakwirihira kugira ngo uyu mwaka nawo utamfana ubusa.

Umuseke.com: Ally Soudy murakoze cyane ku kiganiro tugiranye

Ally Soudy: Murakoze namwe. Imana ikomeze kubafasha mu byo mukora.

Plaizir MUZOGEYE
UM– USEKE.COM