Album ya Patrick Nyamitali imaze imyaka 7 muri studio

Patrick Nyamitali umwe mu bahanzi b’abanyarwanda benshi bemeza ko ari umuhanga, unaherutse mu irushanwa rya Tusker Project Fame session 6, afite album imaze imyaka 7 muri studio.

Imwe mu mpamvu iyo album ya Nyamitali yatinze muri studio igihe kigera ku myaka 7 yose, ngo ni uko yagiye aburana na Producer wayikoragaho ariwe Nitunga Aaron kandi akaba ariwe yifuzaga ko yayitunganya.

Mu kiganiro na Magic Drive gikorwa na Ugeziwe Ernesto, Patrick Nyamitali yatangaje byinshi ku bibazo agenda abazwa n’abakunzi b’ibihangano bye kukuba nta album ye babona hanze kimwe n’izabandi bahanzi.

Yagize ati “Nibyo koko mfite album imaze igihe kigera ku myaka 7 itunganywa kuko natangiye kuyikoraho mu 2007. Ariko impamvu ni uko Producer wagombaga kuyitunganya yagiye agira ingendo mu mahanga nanjye nkaba ndi mu masomo bityo tukaburana, ariko ubu noneho nta kindi kintu mpugiyeho atari album.

Abantu benshi bagenda bambaza aho bashobora gukura album yanjye, gusa irimo gutunganywa mu minsi ya vuba iraba igeze hanze”.

Abajijwe izina ry’iyo album irimo gutunganywa, yavuze ko atari yamara guhitamo izina ko agishakisha indirimbo zayitirira, iyo album ikazaba igizwe n’indirimbo zigera ku 10.

Patrick Nyamitali ni umuhanzi wamenyekanye cyane mu ndirimbo nka ‘Mensiya’ imwe mu ndirimbo yatumye akundwa cyane.

Reba mu mashusho indirimbo ya Patrick Nyamitali yise ‘Mensiya’.

[youtube url=”https://www.youtube.com/watch?v=s5XVqkM7KFU” width=”560″ height=”315″]

Joel Rutaganda

ububiko.umusekehost.com