Airtel- Rwanda yateye inkunga Rwanda Mountain Gorilla Rally

Jaspreet Chatte niwe watsinze isiganwa  ry’imodoka ryitwaga 2015 Rwanda Mountain Gorilla Rally. Iri siganwa ryatewe inkunga  na Airtel-Rwanda  hamwe n’ibindi bigo harimo na Rwanda Automobile Club.

Iri rushanwa ryarangiriye muri Hotel Umubano Hotel, abenshi mu  bashoferi 20 bakaba bari baturutse muri Uganda. Itsinda ry’abashoferi bo muri Uganda bari bahagarariwe na Jon Consta na Desh Kananura, uwa mbere akaba yaraje ku mwanya wa kane undi akaza kuwa gatanu.

Rwanda Mountain Gorilla Rally  ije iri ku rwego rwa gatanu mu yandi  marashanwa azabanziriza irushanwa ryanyuma ryitwa  Africa Rally Championship.

Uretse kuba Airtel Rwanda  yifatanya mu bikorwa byo gufasha abaturage kubaho neza, izwiho kugira uruhare rugaragara  mu giteza imbere imikino n’imyidagaduro .

Muri iki gihe iri gufasha gutoza abana bato bafite impano yo gukina umupira w’amaguru bazwi ku izina rya Airtel Rising Stars  bafite munsi y’imyaka 17.

Ushinzwe itumanaho muri Airtel Rwanda, Clementine Nyampinga yemeza ko bazakomeza gufasha mu buryo bwinshi iri rushanwa ndetse n’ayandi kandi ngo ubu bufatanye buzatanga umusaruro ku nyungu z’abakiliya bayo.

UM– USEKE.RW