AIGP Kaweesi wishwe ni Se wabo wa Frank Joe

Rukundo Frank niyo mazina ye bwite. Kubera ubuhanzi bw’indirimbo no kuba ari umunyamideli wabigize umwuga yaje kwitwa Frank Joe. Ari mu gahinda gakomeye ko kubura Se wabo wishwe arashwe.

Kuri uyu wa Gatanu nibwo hamenyekanye amakuru avuga ko Umuvugizi w’Igipolisi cya Uganda, AIGP Andrew Felix Kaweesi n’abandi bapolisi babiri bamurindaga bishwe barasiwe hafi y’urugo rwe.

Aya makuru yageze kuri Frank Joe uri muri Canada unaherutse guhabwa ubwenegihugu bw’icyo gihugu bumwemerera gufatwa nk’umuturage waho.

Ku ifoto ya nyakwigendera Frank Joe yashyize ku rubuga rwe rwa Instagram yanditse amagambo agira ati “Uruhukire mu mahoro!!!Kugeza ubwo tuzongera tugahura”.

Yabwiye Umuseke ko nyakwigendera ari Se wabo ku ruhande rwa Se. Abajijwe ko ashobora kuzagaragara mu bazajya guherekeza AIGP Kaweesi, yavuze ko nta byinshi afite yabivugaho.

Mu nshuti ze zagiye zimwihanganisha kuri ibyo byago yagize harimo na Uncle Austin. Mu rurimi rw’ikigande yagize ati “Kitalo Nyoo”. Ibi ngo bishatse kuvuga ko ari ibyago bikomeye.

Mu mwaka wa 2015 izina rya Frank Joe nibwo ryamamaye cyane muri Afurika ubwo yitabiraga irushanwa rya BigBrother Africa.

Ibi byanatumye arushaho kwamamara ku isi ubwo yagaragaraga muri filime yitwa ‘PainKillers’ nayo yasohotse muri 2015 ikaba ari filimi ikozwe mu bwoko bw’iz’intambara, imirwano, ikoranabuhanga ndetse n’itera ubwoba.

Joel Rutaganda

UM– USEKE.RW