Agahenge k'amasaha 72 kumvikanyweho muri Gaza

Kuri uyu wa mbere, Israel irohereza mu Misiri abayihagarariye mu  biganiro by’amahoro hamwe na Hamas. Ibi biraba nyuma y’iyumvikanwaho ry’agahenge k’amasaha 72 katangiye gukurikizwa guhera sa sita z’ijoro ryacyeye. Intambara hagati ya Israel na Palestine imaze guhitana abantu 1 977 ku mpande zombi bamaze kugwa muri iyi mirwano kuva yatangira tariki 08/07/2014.

Ministeri y’ubuzima ya Palestine ivuga ko abantu 1,911 kugeza ubu bamaze kwicwa 10,000 barakomeretse abarenga 520 000 bavuye mu byabo. Ku ruhande rwa Israel abasirikare 64 bamaze kugwa muri iyi mirwano naho abaturage babiri nabo bahasize ubuzima, muri Israel abamaze guhunga ni ababarirwa hagati ya 5 000 na 8 000.

Aka gahenge katangiye kuri uyu wa mbere katumye abantu batangira kugarura ikizere ko ubushyamirane hagati ya Hamas na Israel bugiye guhagarara, amahoro akagaruka nyuma y’ukwezi n’icyumweru kimwe barasana bikomeye.

Igihugu cya Misiri gihuza impande zihanganye cyemereye Al Jazeera ko cyumvikanye n’impande zombi kuri aka gahenge k’amasaha 72.

Abayobozi muri Israeli bemeye ko ibiganiro byatangira nyuma y’uko babisabwe n’igihugu kibahuza cya Misiri. Misiri yasabye ko abari mu biganiro bagera ku mwanzuro urambye wo gihagarika imirwano.

Nubwo hari ikizere ko ibi biganiro biri butume agahenge karamba, ku wa gatanu ushize agahenge kandi masaha 72 kari kemeranyijweho n’impande zombi  ntikarangiye kuko Hamas yahise yohereza ibisasu muri Israel ako gahenga katararangira maze Israel nayo yihimura bikomeye hapfa abarenga 10 harimo n’abana.

Umunyamakuru wa Al Jazeera’ witwa Nisreen El-Shamayleh uri i Yeruzalemu avuga ko Minisitiri w’intebe wa Israel, Benjamin Netanyahu ubu yugarijwe n’igitutu kinshi haba imbere mu gihugu ndetse no ku rwego mpuzamahanga ngo ahagarike intambara.

Mu gihugu imbere, abaturage bakuwe mu ngo zabo ngo bahunge ibitero bya Hamas barasaba gusubizwa mu ngo zabo kuko barambiwe inkambi kandi ingabo za IDF zaravuze ko urugamba rutazatinda kurangira.

Ku rwego mpuzamahanga, ibihugu bikomeye harimo na USA birasaba Israel ko yakongera ingufu mu biganiro na Hamas bibera mu Misiri aho gukomeza intambara.

Minisitiri w’umutekano mu gihugu wa Israel, Yitzhak Aharonovitch yabwiye abanyamakuru ko ibi biganiro nibitinda, nta kindi kizakorwa kitari gusubira muri Gaza kurasa Hamas.

Umukuru wa Hamas Khaled Meshaal yabwiye AFP ko  kimwe mu bintu by’ingenzi ibi biganiro bigomba kugeraho ari uko ingabo za Israel zava burundu muri Gaza  kandi Gaza igakomererwa ku kato yashyizwemo na Israel kayibuza kwisanzura no kugenderanira n’ibihugu by’inshuti.

UM– USEKE.RW