Afro-Basket 2013: Utoza u Rwanda ngo ahangayikishijwe na Tunisia gusa

Ikipe y’igihugu ya Basket yageze muri Cote d’Ivoire amahoro, iyi kipe yagize akabazo ko kubura ikibuga bakoreraho imyitozo ariko ubu yatangiye imyitozo, ikipe imeze neza kandi bacumbitse ahantu heza nkuko babitangaza. Umutoza Moise Mutokambari yatangaje ko we atewe impungenge gusa n’ikipe ya Tunisia mu matsinda.

Imikino igomba gutangira kuri uyu wa kabiri ariko u Rwanda umukino wa mbere bazawukina kuwa gatatu, aho bagomba guhura n’ikipe y’igihugu ya Burkina Faso.

Aya marushanwa yitabiriwe n’amakipe y’ibihugu agera kuri 18, umwaka wa 2011 iki gikombe cyatwawe na kagoma zo muri Tunisia.

Kapiteni w’Amavubi Mugabo Arstide yavuze ko itsinda barimo ritoroshye agereranyije n’iry’ubushize kuko ubu bari kumwe na Tunisia yatwaye igikombe, Maroc yagarukiye muri 1/4.  Avuga ko Burkina Faso ariyo batazi imikinire yayo ariko batayisuzugura.

Umutoza Moise Mutokambali we yagize ati ” Icya mbere ni uko turi kureba uko abakinnyi basubira muri ‘mood’ ya competition, ariko ndabona nta kibazo gihari gusa ikipe impangayikishije muri iri tsinda ni Tunisia, Maroc yo n’ikipe nayo ifite inararibonye ariko Burkina Faso yo ni nk’u Rwanda nta bwoba iduteye”

Uko gahunda y’amarushanwa iteye

JD NSENGIYUMBA Inzaghi
UM– USEKE.RW