Africa y’epfo:Kuki abimukira bibasiwe muri iki gihe?

Hashize iminsi muri Africa y’epfo hari amakimbirane hagati ya ba kavukire n’abimukira, aba mbere bashinja aba kabiri ko baje kubanyunyuza imitsi kuko ngo aribo bafite akazi keza muri kiriya gihugu.
Ibi byatumye ba kavukire badukira amaduka baratwika, ayandi barayasahura, ndetse bica abantu batandatu bamwe babatwitse, abandi babicishije imihoro n’amacumu.

Abarokotse bahungiye muri za stade no ku biro bya Police ahantu hatandukanye. Ubwicanyi bukomeye bwabereye mu mujyi wa Durban ariko no mu yindi mijyi ikomeye bwarahageze.

Umwami w’Abazulu niwe wakongeje umuriro

Umwami w’abo mu bwoko bw’Abazuku witwa Goodwill Zwelithini ngo mu nama yagiranye n’abaturage be yagize ati: “ Igihe kirageze ngo abimukira bazinge utwabo batahe kuko badutwariye imirimo none twabaye abashomeri.”
Nyuma gato y’ayo magambo, abatuye Durban bahise badukira amaduka y’abimukira barasahura, imvururu n’ubwicanyi bitangira ubwo.

Ibiro by’Umwami Goodwill byavuze ko abantu bamwumvise nabi, ko atashakaga guhamagarira abaturage guhohotera abimukira.

Umwami kandi yikomye abanyamakuru ngo bamuvugiye ibyo atavuze.
Nubwo muri Africa y’epfo abami b’imiryango runaka bagaragara cyane mu mihango itandukanye iranga abaturage babo, ku rundi ruhande barubahwa cyane k’uburyo ijambo bavuze rigira imbaraga zigaragara.

Umuryango w’Abibumbye wo wemeza ko aya makimbirane yatangiye muri Werurwe uyu mwaka ubwo abaturage bamwe bagiranaga amakimbirane n’abakozi b’abimukira.

Impamvu ituma abimukira aribo bibasiwe muri iki gihe:

Bamwe muri ba kavukire bo muri Africa y’epfo bashinja abimukira ko bigaruriye akazi hafi ya kose ko muri kiriya gihugu kandi ngo barimo ba rwiyemezamirimo benshi, bityo bigatuma ubushomeri bwiyongera kuri ba kavukire.

Imibare itangwa na Leta yerekana ko ubushomeri buri ku kigero cya 25% muri ba kavukire.
Abasesengura basanga ibi bituma muri kiriya gihugu haba ibikorwa by’urugomo, ruswa no gutura mu kajagari, byose bishingiye k’ubushomeri.

Umukuru w’igihugu Jacob Zuma avuga ko Leta ye yagerageje kandi igikomeje kugabanya ubushomeri. President Zuma kandi yemeza ko abimukira bafatiye runini ubukungu bw’Africa y’epfo ifatwa nka kimwe mu bihugu bikize muri Africa.

Imibare itangwa na Kaminuza ya Witwatersrand ivugwa ko muri Africa y’epfo hari abimukira miliyoni 2, uyu mubare ukaba ungana na 4% by’abaturage bose.

Muri aba bimukira, abakomoka muri Zimbabwe nibo benshi.
Ba mukerarugendo benshi bo muri Africa buri mwaka bajya muri Africa y’epfo kuko ubuzima budahenze cyane kandi hakaba ibikorwa remezo byinshi.

Si ubwa mbere muri iki gihugu habaye ibikorwa byo kwirukana ku ngufu abimukira no kubasahura utwabo.
Muri Mutarama uyu mwaka, abajura badukiriye amaduka y’abimukira barayasahura.
Human Rights Watch yemeza ko no mu mwaka washize(2014) habaye urugomo nka ruriya.

Mu myaka irindwi ishize muri Johannesburg habereye ibikorwa bwo gusahura no kwirukana abimukira ndetse abarenga 12 barishwe. Uru rugomo rwageze no mu mujyi wa Cape Town.

Abenshi mu bibasiwe icyo gihe bari abakomoka muri Zimbabwe nk’uko bimeze n’ubu.
Icyo gihe Police yahagaritse abakekwaho uruhare muri urwo rugomo bagera kuri 200.

Muri 2006, muri Cape Town habereye urundi rugomo rwamaze amezi menshi.
Uretse Zimbabwe hari ibindi bihugu byibasiwe harimo Nigeria, Somalia na Ethiopia.

Ubu ibihugu bya Kenya, Malawi na Zimbabwe byamaze gukura abaturage babyo muri kiriya gihugu.
Muri Zambia, radio yitwa QFM yavuze ko itazongera gucuranga indirimbo z’abahanzi bo muri Africa y’epfo mu rwego rwo kwifatanya n’abahuye na kariya kaga.

Muri Mozambique, ikigo gitunganya kandi kigatanga ingufu zikomoka ku binyabutabire(chemicals) cyitwa Sasol  cyo muri Africa y’epfo cyahise gisubiza abakozi bacyo 340 iwabo mu rwego rwo gutinya ko bazahohoterwa na bagenzi babo bakorana bo muri Mozambique mu rwego rwo kwibihimuraho.

Kimwe mu bintu bituma habaho buriya bwicanyi ngo n’ukudasaranganya umutungo w’igihugu mu baturage.
Ikigo cyitwa The Nelson Mandela Foundation cyemeza ko n’ubwo igihugu cyateye imbere nyuma y’uko Politike ya gashakabuhake yiswe Apartheid ihagaze, ubusumbane bwayikomotseho bukigaragara mu bice bitandukanye.

Ngo bizasaba ko urubyiruko rwumva ko umurage rwasigiwe na Nelson Mandela wo koroherana no gukorera hamwe nk’abenegihugu ariwo uzatuma kiriya gihugu cy’umukororombya(pays d’arc-en-ciel) kigira amahoro arambye.

Kugeza ubu abantu batishimiye biriya bikorwa barahagurutse bajya mu mihanda no mu mbuga nkoranyambaga barabyamagana.

Kuri iki  cyumweru President Zuma yasubitse urugendo yari afite muri Indonesia kugira ngo arebe ukuntu yahosha ruriya rugomo.

NIZEYIMANA Jean Pierre

UM– USEKE.RW