Africa: Abaperezida 5 badakunda internet

Abaperezida 5 bo muri Africa badakunda gukoresha internet.

Nubwo ikoranabuhanga rya internet rikomeje  gutera imbere muri Afrika, hari abakuru b’ibihugu bimwe na bimwe bumva ko ritabareba. Nyuma y’urutonde rugaragaza abaperezida 5 bo muri Afrika bakunda gukoresha cyane internet, cyane cyane zimwe mu mbuga zihuza abantu bagahana ibitekerezo nka Facebook na Twitter.

Socialbakers.com rwasohoye urutonde rw’abaperezida batanu (5) badakunze gukoresha imbuga za internet, zirimo Facebook na Twitter. Uru rutonde rwakozwe hakurikijwe abakunzi aba bakuru b’ibihugu bafite. Kumwanya wa gatanu(5), haza perezida wa Namibiya Hifikepunye Lucas Pohamba, aho afite abakunzi 36.  Hifikepunye Lucas Pohamba, ubu ari kuyobora manda ya kabiri(2). Yatowe bwa mbere muri 2004, yongera gutorwa muri 2009.

Ku mwanya wa kane (4) hariho Mohamed Ould Abdel Aziz, perezida wa Muritaniya n’abakunzi 18. Uyu Mohamed Abdel Aziz, akaba ari umusirikare wabigize umwuga. Muri 2005 yahiritse ku butegetsi perezida  Maaouiya Ould Sid’Ahmed Taya wari umaze imyaka 21 ayobora Muritaniya, yongera kuvanaho muri 2008 Sidi Ould Cheikh Abdallahi, aza gutorwa muri Nyakanga 2009.
Ku mwanya wagatatu(3) haza perezida wa Eritereya Issayas Afeworki n’abakunzi 15. Issayas Afeworki, yageze kubutegetsi mu 1993, akaba ari nawe mu perezida umwe rukumbi Eritereya ifite kuva yabona ubwigenge mu 1993, nyuma y’imyaka 30 iri mu ntambara na Etiyopiya.

Umwanya wa kabiri(2) uzaho Sharif Ahmed, perezida wa Somaliya n’abakunzi umunani(8). Sharif Ahmed, perezida kuva muri 2008, aho kugeza ubu atarashobora kurangiza intambara imaze hafi imyaka 20 muri iki gihugu.
Umwanya wambere ubonekaho Omar El-Béchir, perezida wa Sudani n’abakunzi batatu(3). Omar el-Béchir, yafashe ubutegetsi mu 1989 akoresheje ingufu za gisirikare, aza kuba perezida byemewe n’amategeko 1993. Ubu aka akurikiranwe n’urukiko mpuzamahanga mpanabyaha ruri i Rahe mu Buhorande, kubera ibyaha akewkwaho ko yakoreye mu ntara ya  Darfour, aho abarenga 300.000 bahaguye.

Ubushakashatsi bwerekana ko mu myaka 20 ishize, intambara ibera muri Sudani yahitanye miliyoni 2, inakura abaturage mu byabo bagera kuri miliyoni  4,5. Gusa ibi ntibyabujije Omar el-Béchir kongera gutorwa n’amajwi 68,24% muri 2010.

Dore batanu bambere bakunda gukoresha internet.

5. Alassane Dramane Ouattara n’abakunzi12.169 . Ni  perezida wa Côte d’Ivoire nyuma gukuraho mukeba we Laurent Gbagbo yari yatsinze mu matora, ariko akanga kurekura ubutegetsi.
4. Paul Kagame (Rwanda) n’abakunzi 15.591 . Perezida w’u Rwanda akaba anashyize imbere ikoreshwa ry’ikoranabuhanga mu nzego zose hagamijwe gutanga service vuba kandi neza. Tubibutse ko anasubiza ibibazo by’abaturage yifashishije internet
3. Jacob Zuma (Afrique du Sud) n’abakunzi 21.145.
2. Laurent Gbagbo (Côte d’Ivoire) n’abakunzi  32.418. Akaba aherutse gukurwaho na Alassane Dramane Ouattara,wari wanamutsinze mu matora.
1. Goodluck Jonathan (Nigeria) n’abakunzi 518.519 .

NGENZI Thomas
Umuseke.com