Abazavamo Miss Rwanda 2016 basuye urwibutso rwa Kigali

Kuri uyu wa kane tariki ya 04 Gashyantare 2016, abakobwa 25 bagomba kuzatoranywamo nyampinga w’u Rwanda 2016 basuye urwibutso rwa Kigali ruri ku Gisozi bigishwa amwe mu mateka yaranze u Rwanda mu gihe cya Jeniside yakorewe Abatutsi mu 1994.

Bamwe muri bo, bagiye babaza ibibazo byerekeranye n’uburyo intambara yatangiye dore ko benshi bari bakiri abana ndetse abandi bataranavuka.

Umuyobozi wa Rwanda Inspiration Back Up ishinzwe gutegura iryo rushanwa Kagame Ishimwe Dieudonne, yatangaje ko iki ari kimwe mu bikorwa byari muri gahunda abo bakobwa bagomba gukora.

Ndetse anatangaza ko ku wa gatandatu tariki ya 06 Gashyantare 2016 bazasura n’urwibutso rw’Intarama mu Bugesera.

Umuhoza Sharifa wahawe umwanya wo gusinya mu gitabo cy’abashyitsi, yatangarije Umuseke ko atari ubwa mbere agiye ku Gisozi ariko aribwo yumvishe neza amwe mu mateka yaranze u Rwanda mu 1994.

Yagize ati “Mu 1994 benshi muri twe twari tukiri bato cyane!!Ariko kugeza ubu tubashije kongera kumenya neza amateka yaranze igihugu cyacu yiyongera ku yo twari tuzi.

Ibyabaye byose twese nk’urubyiruko dukwiye guhaguruka tukaba maso n’ikindi gihe ntibizongere kubaho ukundi”.

Joel Rutaganda

UM– USEKE.RW