Abaturanyi ba Bushayija ngo yiciisha bugufi, akunda Reggae…Ariko ngo ubu ntakigaragara

*Ngo kuva byavugwa ko ‘yimitswe’ ntawe urongera kumuca iryera aho atuye i Manchester …

Inkuru dukesha ikinyamakuru Independent cyasuye Bushayija Emmanuel biherutse gutangazwa ko yimitswe nk’umwami mushya nyuma y’itanga ry’uwahoze ari umwami w’U Rwanda, Kigeli V Ndahindurwa. Iki kinyamakuru kivuga ko abaturanyi ba Bushayija bavuga ko uyu mugabo yicisha bugufi ndetse ko yikundira injyana ya Reggae.

Nyuma y’Itanga rya Kigeli V Ndagindurwa no kwemeza ko azatabarizwa I Mwima ya Nyanza aho yimikiwe, Boniface Benzinge wahoze ari umujyana we, yatangaje ko Bushayija Emmanuel yimitswe nk’umwami mushya.

Gusa abo mu muryango wa Kigeli n’abandi bahanga mu by’amateka mu Rwanda bitandukanyije n’ibi byari byakozwe na Benzinge wavugaga ko Bushayija yimitswe ku bw’umvikane bw’abiru.

Emmanuel Bushayija w’imyaka 56 ubu utuye i Manchester mu Bwongereza yasuwe n’Ikinyamakuru the Independent, abaturanyi be bavuga uko bakiriye neza iyi nkuru yo guturana n’umwami (ntibyemejwe ko ari Umwami).

Umwe mu baturanyi be ba hafi cyane yabwiye ikinyamakuru The Independent dukesha iyi nkuru ati “ Ni umuntu usanzwe cyane, ni we wimesera imyenda akanikorera n’utundi turimo two mu rugo.”

Ni umuntu woroheje ukunda koroshya ibintu. Akunda gukora nijoro yiyumvira indirimbo za reggae. Si kenshi wamusanga hanze…”

Avuga ko Bushayija abana n’umugore we n’abana babo babiri barimo umukobwa n’umuhungu uri mu kigero cy’imyaka 21.

Abandi baturanyi ba Bushayija baganiriye na Independent dukesha iyi nkuru, na bo bavuga ko Bushayija ari umuntu ukunda kwimenya ariko kandi uca bugufi. Gusa bavuga ko kuva yagirwa umwami ntawe urongera kumuca iryera.

Ms Dwan w’imyaka 35 yagize ati “ Siniyumvishaga ko yagirwa umwami nkurikije uko namubonaga yisanzuye ku bantu. Ndacyabitekerezaho…”

Independent ivuga ko umuntu umwe mu baturanyi ba hafi ba Bushayija ari we wari uzi ko uyu mugabo wahoze ari umucuruzi wa Pepsi ari umwana w’igikomangoma.

Mu mashusho agaragaza iyimikwa rya Bushayija nk’umwami, Boniface Benzinge yavuze ko Bushayija ahawe izina rya Yuhi VI.

Bushayija uyu ariko iyimikwa rye ntabwo ryemewe n’abo mu muryango we bavuze ko atari Umwami kuko yimitswe n’abantu babiri gusa, ndetse ko igihe cy’Ubwami mu Rwanda cyarangiye kuko bwakuwe na Republika.

UM– USEKE.RW