Abaraperi barahungira muri Afrobeat kubera kudakinwa- Bac- T

Nkubiri Gerard Innocent Junior wamenyekanye cyane mu ndirimbo yakoranye na The Ben bise ‘Ice Cream’ uzwi mu buhanzi nka Bac-T, avuga ko abaraperi basanzwe bakora injyana ya HipHop barimo guhungira muri Afrobeat kubera ko ibihangano byabo bitakirwa ngo bimenyekanishwe.

Uretse kuba ari umuhanzi, Bac- T asanzwe akora umwuga w’itangazamakuru benshi mu badakunda gukurikirana ibijyanye n’umuziki ari naho bagiye bamumenyera ubwo yakoraga kuri Contact FM.

Avuga ko injyana ya HipHop mu myaka ibiri ishize bigaragara ko idahagaze neza ugereranyije n’umuvuduko yari izanye muri 2013 na 2014 byaje no kugaragarira mu irushanwa rya Primus Guma Guma Super Star ryegukanywe na Riderman ndetse na Jay Polly mu myaka yikurikiranya.

Impamvu avuga ko iyo njyana ya HipHop itagikunzwe cyane, ngo ni uburyo hari ibitangazamakuru bimwe na bimwe bitemera kwakira indirimbo ziri muri iyo njyana.

Ahubwo ugasanga barakira izindi ndirimbo ziri mu zindi njyana cyane cyane Afrobeat na R&B bityo HipHop ikaburizwamo.

Mu kiganiro yagiranye na Radio 10, Bac- T yatangaje ko ibintu byo kwiyumvisha ko HipHop ari injyana y’abantu basa nabi cyangwa se bakoresha ibiyobyabwenge byari bikwiye guhinduka.

Abantu bakumva ko icya mbere ari ubutumwa buri muri ya ndirimbo bufite icyo bushobora guhindura muri sosiyete nyarwanda.

Ariko akanavuga ko n’abaraperi bakwiye gufata ingamba zikarishye zo guhindura isura bafite hanze yo kuba aria bantu badashobotse cyangwa se babe bakwitwa andi mazina.

https://www.youtube.com/watch?v=4EAYcWfYBxo

Joel Rutaganda

UM– USEKE.RW