Abapolisi 2 nibo bakekwaho kuba barishe Makonene wakoreraga Transparency

Kuri uyu wa 25 Nzeri Polisi y’u Rwanda yatangaje ibyavuye mu iperereza rimaze umwaka ku rupfu rwa Gustave Makonene wari umuhuzabikorwa w’umuryango mpuzamahanga “Transparency International Rwanda” i Rubavu. Polisi yerekanye abapolisi babiri ivuga ko baba bafite uruhare mu rupfu rwa Makonene wishwe tariki 17/07/2013.

ACP Theos Badege yatangaje ko abapolisi babiri ba Kaporali Nelson Iyakaremye na Isaac Ndabarinze aribo iperereza rimaze umwaka rigaragaza ko bagize uruhare mu rupfu rwa Makonene wiciwe ku nkombe z’ikiyaga cya Kivu.

Makonene wari uvuye ku kazi ahagana saa tatu z’ijoro, ACP Theos Badege avuga ko iperereza ryasanze aba bapolisi babiri bari batiye imodoka ya Pick up y’umuntu w’umucongoman, maze bagafata Makonene bakamushyira mu modoka ku ngufu, bajya kumwicira hafi ya Nyamyumba mu nzira igana i Kigufi ku nkengero z’ Kivu.

ACP Badege avuga ko abakekwa mbere bari bane ari abacuruzi kuko ngo aribo bavuganye nawe bwa nyuma kuri telephone. Gusa ngo polisi yakomeje iperereza kugera kuri abo bapolisi.

Aba bapolisi bombi ngo binjizaga amabuye y’agaciro mu Rwanda mu buryo butemewe n’amategeko maze Makonene aza kubimenya ndetse atera intambwe arabegera ababwira ko ibyo bakora bitemewe n’amategeko.

Nelson Iyakaremye yaje kwimurirwa i Kigali Isaac Ndabarinze agumishwa i Rubavu maze bahita bibwira ko ibyo bakora byamenyekanye, niko gucura umugambi wo guhitana Makonene Gustave wari wababwiye ko azi ibyo bakora ndetse ngo yabasabye kubireka kuko atari byiza.

Abaregwa bagaragazaga ipfunwe no gushisha amasura yabo, bombi bahakanye ubu bwicanyi bashinjwa. Isaac Ndabarinze yavuze ko yiteguye kuburana kandi afite ibimenyetso bimurengera.

Nelson Iyakaremye nyuma y’urupfu rwa Makonene, we yaje gufungirwa icyaha cyo kwaka amabuye umucuruzi w’amabuye y’agaciro yitwaje umurimo we wa Polisi akamubwira ko ibyo ari gukora bitemewe. Ubu afungiye kuri gereza ya Kimironko.

ACP Badege ati “Iperereza tumazemo umwaka ntabwo twari kurireka kubera agaciro duha ubuzima bw’umuntu. Dufite ibimenyetso bihagije. Ubu igisigaye ni ukubashyikiriza ubutabera n’ibimenyetso bibashinja.”

Photos/D S Rubangura/UM– USEKE

Daddy SADIKI Rubangura
UM– USEKE.RW