“Abapfobya Jenoside ni ibigarasha,” Min Nsengimana

Minisitiri w’Urubyiruko n’Ikoranabuhanga kuri uyu wa gatandatu tariki 21 Werurwe 2015 mu gikorwa cyiswe “AERG/GAERG WEEK” cyabereye mu Bisesero aho abanyeshuri n’abahoze ari abanyeshuri barokotse Jenoside yakorewe Abatutsi muri mata 1994 bakora umuganda wo gufasha abatishoboye, yavuze ko abapfobya Jenoside yakorewe Abatutsi ari ibigarasha.

Uwari uhagarariye CNLG muri iki gikorwa ku rwibutso yavuze ko urwibutso rwa Bisesero rwubatse ku buryo bugaragaza amateka n’Ubutwari Abasesero bagiye bagira mu gihe cya Jenoside yakorewe Abatutsi n’uburyo bagiye baterezwa imisozi, ku buryo muri icyo gihe nta mugore cyangwa umwana wabashije kurokoka mu bantu bari bahahungiye.

Jean Philbert Nsengimana, Minisitiri w’Urubyiiruko n’Ikoranabuhanga (MYICT) wari umushyitsi mukuru muri iki gikorwa yavuze ko nk’umuntu ukomoka muri aka gace ashimira abarokotse Jenoside, akagaya ubugwari n’ubugome byaranze abakoze Jenoside n’ubuyobozi bubi bwateguye bukanashyira mu bikorwa jenoside.

Min. Nsengimana ati “Namaganye abakomeza gupfobya Jenoside yakorewe Abatutsi mbamenyesha ko batsinzwe ndetse ko ikarita ya politike bakinaga yamaze kuba ikigarasha nabo ubwabo ni ibigarasha.”

Min. Nsengimana yasabye abakomoka i Karongi gukomeza kwandika amateka ku buryo Bisesero itazagumana amateka ya Jenoside gusa ahubwo izagira n’iy’iterambere ashingiye ku cyerekezo igihugu gifite kuko ibyabaye bitazongera ukundi ndetse no kubyaza umusaruro ubwiza nyaburanga bwa Karongi.

Yashimye intego esheshatu zigize igikorwa cya AERGE/GAERG Week zirimo, Kwigira kurambye, Kwita ku barokotse Jenoside batishoboye, Gusigasira amateka bita ku nzibutso, Gushima abagize ubutwari mu guhagarika jenoside n’abahishe Abatutsi no Kwiteza imbere n’ibindi.

Nsengimana avuga ko abishe Abatutsi mu Bisesero bari abagome ati “Icyatumaga abantu benshi baza kwica mu Bisesero ni uko bababwiraga bati ‘ni mugende mwice Abasesero murye Inka zabo’, simpamya ko iyo bica Abatutsi bose bakabamara bakarya ayo matungo agashira batari kwadukira n’abantu bakabarya?”

Urwibutso rwa Bisesero rwubatse ku buryo:

*Amadarage agaragaza uburyo Abasesero baterejwe imisozi

*Amabuye asashe agereranywa n’umusozi wa Muyira

*Imfuruka igaragaza ko bashakaga aho bikinga

*Ibyumba icyenda bishyinguyemo bihagarariye Komini icyenda z’icyahoze ari Perefegitura ya Kibuye zifite abantu bari bahungiye mu Bisesero.

*Amacumu icyenda n’Ibuye bigaragaza intwaro Abatutsi b’Abasesero bagerageje gukoresha barwanya umwanzi (Amacumu bari bayatunze nk’aborozi).

*Imva eshatu ntoya zishyinguyemo Intwari zihagarariye izindi.

Jean Damascene Nsabimana wavuze amateka y’icyahoze ari Perefegitura ya Kibuye kuva mbere ya jenoside yavuze ko Abatutsi bo mu Bisesero batangiye kwicwa n’Abaparimehutu kuva mu 1963 ndetse ko iyi perefegitura yari ku mwanya wa kane mu guturwa n’Abatutsi benshi.

Yavuze ko perefegitura za mbere zari zituwe n’Abatutsi benshi kurusha izindi ari Butare, Kigali-ngari, Gitarama na Kibuye

Mu ijambo rye Jean de Dieu Mirindi Umuyobozi wa AERG yashimiye Abaterankunga batandukanye bakomeje kubaba hafi barimo Leta n’Abikorera batanze inkunga ya miliyoni 12 z’amafaranga y’u Rwanda azabafasha kuzuza inzu zirenga eshanu bamaze gutangira basanira incike.

Ibikorwa cya AERG/GAERG week byatangiye ku itariki 07 uku kwezi bikazasozwa kuri 06 Mata bikazaba bizajya biba buri mwaka mbere yo kwibuka Jenoside yakorewe Abatutsi.

Joselyne UWASE
UM– USEKE.RW