Abanyarwanda nibo bazayobora umukino wa St-George SC na AS Vita Club ya Sugira

Abasifuzi batatu b’abanyarwanda bayobowe na Hakizimana Louis bazayobora umukino w’amatsinda ya CAF Champions League uzahuza ikipe ya St George na AS Vita Club.

Kuri uyu wa gatandatu tariki 3 Kamena 2017 mu mujyi wa Addis-Abeba hateganyijwe umukino wa gatatu wo mu itsinda rya Total CAF Champions League uzahuza amakipe ibihangange muri ruhago ya Afurika.

Uyu mukino uzahuza Saint-George Sports Club yo muri Ethiopia na Association Sportive Vita Club yo muri DR Congo, uzayoborwa n’abasifuzi b’abanyarwanda Hakizimana Louis “Lu”, azasifura hagati naho  Ndagijimana Theogene na Hakizimana Ambroise bazasifura ku mpande.

Vita Club ya rutahizamu w’ikipe y’igihugu Amavubi Sugira Ernest izajya muri uyu mukino ishaka intsinzi cyane kuko yatsinzwe imikino ibiri ibanza mu itsinda bahuriyemo na Esperance de Tunis yo muri Tunisia na Mamelodi Sundowns yo muri Afurika y’epfo.

Uyu rutahizamu narangiza uyu mukino azahita agarukana mu Rwanda n’aba basifuzi aje kwitabira ubutumire bw’ikipe y’igihugu yitegura Centre Africa mu gushaka itike y’igikombe cya Afurika, umukino uteganyijwe mu mpera z’icyumweru gitaha.

Roben NGABO

UM– USEKE