Abanyamurenge barasaba UN ubutabera ku bwicanyi bw'i Gatumba

13 Kanama – Impunzi  z’Abanyekongo b’Abanyamulenge ziba mu Nkambi ya Kiziba, mu Karere ka Karongi zashimiye Umuryango w’Abibumbye (UN) wazibaye hafi mu bibazo byazo ariko bawusaba ko zahabwa ubutabera, abagize uruhare mu bwicanyi bwakorewe bagenzi babo  hakicwa abagera ku 174 mu Nkambi ya Gatumba mu Burundi babiryozwa.

Igikorwa cyo kwibuka  ubwicanyi bwabereye  mu Gatumba mu 2004, aho abanyamulenge  174 bishwe bazira uko baremwe, cyabanjirijwe n’ijoro ry’ikiriyo kuri uyu wa 12 Kanama n’urugendo  rwakozwe mu mutuzo muri iki gitondo cyo kuwa gatatu,  hagati mu nkambi izi mpunzi zituyemo.

Ku byapa bitandukanye izi mpunzi zari zifite, zagarukaga ku butabera umuryango mpuzamahanga wirengagije guha  abarokotse ubu bwicanyi.

Uhagarariye  inkambi  ya Kiziba  Kayagwe Jacques  yavuze ko  aho impunzi za Banyamulenge zari zarahungiye,  hari hacunzwe n’Ishami ry’Umuryango w’abibumbye wita ku mpunzi ( UNHCR)  ndetse  n’abasirikare  b’u Burundi ku buryo bari bizeye umutekano usesuye.

Yongeyeho ko batunguwe  kandi bababazwa n’uko umutekano bari bizeye atari wo babonye kuko mu nkambi  bari bacumbitsemo harimo  ubwoko butandukanye  bw’Abanyekongo hicwa gusa abo mu bwoko bw’Abanyamulenge kandi biba  iri shami rya UN rirebera.

Yagize ati:’’Turasaba UN ko mubyo igenera  impunzi z’Abanyekongo bo mu bwoko  bw’Abatutsi  yagombye gushyiramo no kubashakira ubutabera  nk’uko ibikora  ibaha  ibyo kurya.’’

Rugaza Jean Baptiste, umwe mu batanze ubuhamya warokotse ubwo bwicanyi, yabanje gushimira Leta y’u Rwanda  ikomeje kubaba hafi ibinyujije muri Minisiteri y’imicungire y’ibiza no gucyura impunzi.

Yasabye ko Umuryango w’ibihugu by’Iburasirazuba( EAC) u Rwanda n’ibindi bihugu bihuriyemo bafatanya gukurikirana  abagize uruhare mu bwicanyi bwo mu Gatumba bari muri ibi bihugu biyemereye ko ari bo bishe Abanyamulenge  bari kwidegembya kandi bagashyikirizwa ubutabera.

Yagize ati:’’ Aghaton  Rwasa na Pasiteri Habimana  bigambye ko ari bo bishe izo nzirakarengane none bakomeje  kugenda hirya no hino mu bihugu byo muri aka karere.’’

Mukundwa  Denis  watanze  ikiganiro ku mateka ya Congo yavuze ko abagize uruhare mu bwicanyi bwo Gatumba bamwe muri bo ko ari interahamwe zari zisize zikoze Genoside yakorewe Abatutsi mu Rwanda bihuje n’abandi bo mu bwoko  bw’Abanyekongo ndetse na FNL-Parpehutu  yo mu Burundi  bahuza umugambi  wo kwica.

Yasabye  impunzi ko zitacika intege ahubwo ziharanira uburenganzira bwazo zisaba ko abagize uruhare mu bwicanyi ku  Banyamulenge  bafatwa bagahanwa.

Muri iki gikorwa cyo kwibuka, izi mpunzi  zasabye ko  zahabwa uburenganzira bwo gusura  inzibutso  zishyinguyemo  imibiri y’inzirikarengane  ziherereye mu Gatumba ndetse n’izishyinguye  i Mudende  ho mu Karere  ka Rubavu.

Photos/E.Muhizi/UM– USEKE

MUHIZI ELISEE
UM– USEKE.RW/ Karongi