”Abantu nibiyubakire ubushobozi aho kwiringira UN”- Lt Gen Dallaire

27 Mata 2015, Musanze – Gen Romeo Dallaire arasaba abantu kwishakamo ubushobozi bwo kwikemurira ibibazo ubwabo aho gutegereza Umuryango w’abibumbye kuko hari ighe utinda gutabara. Yabivugiye mu ishuri rikuru rya gisirikari ry’i Nyakinama ubwo yatangaga ikiganiro ku bikorwa bya gisirikare mu butumwa bwo kubungabunga amahoro,ingorane n’ibikwiye gukorwa.

Uyu mugabo wari uyoboye ingabo z’Umuryango w’Abibumbye mu Rwanda mu gihe cya Jenoside yakorewe Abatutsi muri Mata 1994 yagaragaje ko yashatse gufasha abicwaga ariko agatereranwa n’ibihugu bikomeye n’Umuryango w’Abibumbye wari wamutumye.

Abajijwe n’umunyamakuru niba abantu bakwiriye kwiringira umuryango mpuzamahanga yagize ati:”Ni ikibazo cyiza, ariko ikindi kibazo ni ninde wakwizera mugihe Umuryango mpuzamahanga udahari? Ni ubushobozi bw’Akarere.”

Yagaragaje ko ibihugu bigomba kubaka kandi bigashyira imbere ubafatanye mu karere hagamijwe kwikemurira ibibazo.

Yongeye ati “Icy’ibanze ni ukwiyubakira ubushobozi hanyuma ibihugu bigahabwa uburyo n’igihe bityo abaturage bakamererwa neza bitagombye ingabo za UN bitewe no kutagira ubushobozi cyangwa zatinze kuza.”

Umuyobozi wa Rwanda peace Accademy Col. Jill Rutaremara yemeje ko gutumira Lt Gen (Rtd) Romeo Dallaire biri mu rwego rwo gusangiza ingabo ubunararibonye bw’ibyamubayeho nko muri Genocide aho yashakaga gutabara ariko akananizwa n’izindi nzego.

Col Rutaremara ati:”Tuba dukeneye inararibonye mu bikorwa byo kubungabunga amahoro kugira ngo basangize abasirikari imbogamizi mu kubungabunga amahoro ku isi. Ikindi ni uko mu gitabo cye kivuga kuri Genocide hari amasomo menshi dukuramo.”

Yongeyeho ko Lt Gen Dallaire yagaragaje ko hari inyungu zitandukanye zituma ibihugu bitabara cyangwa ntibitabare aho yavuze ko ubwo yatabarizaga abanyarwanda yabazwaga niba hari amabuye y’agaciro ari muri iki gihugu.

Uretse kuba Romeo Dallaire yari ayoboye izi ngabo z’Umuryango w’Abibumbye mu gihe Genocide yakorwaga, yanabaye Senateri mu gihugu akomokamo cya Canada.

Yashinze ikigo kirwanya ikoreshwa ry’abana mu mitwe ya gisirikare(The Remeo Dallaire Child soldier initiative) ndetse hari n’ikigega cyamwitiriwe gifasha urubyiruko kwiyubakamo imiyoboborere myiza(The Romeo Dallaire Foundation)

Yanditse ibitabo byinshi birimo icyasomwe cyane ”Shake hands with the Devil” kivuga kuri Genocide yo mu Rwanda.

Placide HAGENIMANA
UM– USEKE.RW/Musanze