Abana barashishikarizwa kugira umuco wo kuzigama

Mu nama yahuje ihuriro ry’ibigo by’imari ,AMIR , n’abafatanyabikorwa baryo mu mushinga wo  gukangurira abana kugira umuco  wo kwizigama, abari muri iri huriro berekanye aho uyu mushinga ugeze ndetse n’icyo uzamarira abana bakiri mu mashuri abanza n’ayisumbuye.

Mu kiganiro n’abanyamakuru Gatera Augustin  wari uhagarariye  Rwanda Education Board ( REB) yatangarije  abanyamakuru ko iyo bavuga ireme ry’uburezi baba bashaka kurema  umunyarwanda w’ejo hazaza, ufite ubumenyi, agaciro bizatuma igihugu gitera imbere.

Yagize ati: Ntabwo ari ukuvuga ko guha  umuntu amafaranga byatuma ata inshingano ze  zo kwiga uko bisanzwe kuko ibi  bidashobora kubuza abana kwiga kuko bikorwa muburyo bucunzwe neza.”

Yongeyeho ko abakuru b’amashuri  bagomba kugira uruhare mu gutuma  abana batava mu ishuri kandi bakagira ubumenyi bwo gukoresha amafaranga neza”.

Uwizeye Jean Pierre, umukozi ushinzwe  kwigisha abantu kwizigama no gukorana n’ibigo by’imari nawe ashimangira ko  icyo bakora ari ugushishikariza abanyeshuri  bari mu ishuri bagomba guteganyiriza ejo habo hazaza.

Yagize ati: “  Ntabwo nemeranya n’umuntu uvuga ko iyi gahunda  ishobora kubuza umwana  kwiga , umuntu utegura ejo heza  haba harimo no guteganyiriza  amashuri ye  no kumva agaciro ko kwiga , kandi umuntu nk’uyu ntashobora kureka kwiga”.

Iyamuremye Jeremie umwe mu babyeyi bari bitabiriye iyi nama nawe yavuze ko  kuvuga ko abana bashobora kurangara bakarangazwa n’amafaranga  bishoboka , ngo kuko iby’imari bitakwangiza ubwonko bw’umwana.

Mugurwanyana  Zawadi umwe mu banyeshuri bari bitabiriye iyi nama yavuze ko  ibintu byo kubitsa amafaranga babona ko nta kibazo biteye  kuko babyize, kandi bakaba bazi  akamaro bibafitiye kandi  bizabafasha mu gutegura ejo habo hazaza heza.

Yagize ati “Aho kuyabika muri Dortoire (aho abanyeshuri baryama)akaba yakwibwa ahubwo nayajyana muri Banki. Ku ishuri ryacu  twakoze Club yo kuzigama  ku buryo uko tungana tugira gahunda yo kuzigama  kandi  abarimu bacu barabidushishikariza kandi natwe twaragiye turabishishikariza aba byeyi bacu barabyumva.”

Aba bana bavuga bifitiye ama konti yabo.

Mu gusohoza Rita Ngarambe, Umunyamabanga Nshingwa bikorwa  muri  AMIR yavuze ko  barimo gukorera mu mashuri  100 ahuje  amashuri abanza n’ayisumbuye , bagakorera no mu mashuri ategura abarimu ya TTC(Teacher training centers)

Daddy SADIKI RUBANGURA
UM– USEKE.RW