Abakinnyi ba As Kigali bategewe $ 1000 nibasezerera Difaa El Jadida

Mu myitozo ya nyuma y’ikipe ya As Kigali mbere y’umukino n’ikipe ya Difaa El Jadida yo mu gihugu cya Maroc yaberga kuri stade ya Kigali i Nyamirambo ni ho njyanama y’umujyi wa Kigali yasezeranyije buri mukinnyi amadolari 1000 nibaba basezereye iyi kipe.

Njyanama y’umujyi yasuye ikipe ya As Kigali mu rwego rwo kubereka ko bayiri inyuma mu rugamba barimo rwo guhangana n’amakipe akomeye.

Ushinzwe umutungo mu mujyi wa Kigali, Matabaro Jean Marie yatangaje ko iyi kipe niramuka ikuyemo Diffa El Jadida igakomeza mu cyiciro gikurikiraho ko izahabwa $1000 kuri buri mukinnyi ndetse ku munsi w’ejo nibaramuka batsinze umukino ubanza bakazahita bahabwaho $ 200 kuri buri mukinnyi.

Umutoza w’ikipe ya As Kigali, Kassambungo André atangaza ko ikipe ye imeze neza kobone n’ubwo azaba adafite Ndikumana Bodo wagize impanuka ndetse na Mushimiyimana Hmedi wavunikiye mu mukino wa shampayona.

Gusa ngo ikipe agiye gukina nayo arayizi irakomeye, ariko na As Kigali ntiyoroshye.

Kassambungo yagize ati “Twiteguye neza ku buryo twizeye neza ko tuzitwara neza ku mukino w’ejo gusa Abanyarwanda bazatube inyuma.”

Akomeza avuga ko kuba uyu mukino uzareberwa ubuntu bizabafasha kubona abafana bo kubatera ingabo mu bitugu bityo ngo na bo ntibazabatenguha.

Difaa Al Jadida, ni ikipe yashinzwe mu mwaka 1956, gusa kuri ubu umuntu yavuga ko iri mu bihe byayo byiza dore ko no muri shampiyona y’iwabo ihagaze neza kuko irushwa n’iyambere amanota atanu.

Gusa kandi ifite ibirarane bibiri bivuze ko ibitsinze yahita iyobora urutonde rwa shampiyona yo mu gihugu cya Maroc.

NKURUNZIZA Paul
ububiko.umusekehost.com