Abahatanira PGGSS6 ni babiri, muri abo ninjye uzayegukana- Christopher

Christopher ni umwe mu bahanzi bamaze kwagura umubare munini w’abakunzi b’ibihangano bye kubera ahanini gukora indirimbo buri wese akunze kumva yisanga mu butumwa aba yanyujijemo. Kuri we avuga ko irushanwa rya Primus Guma Guma Super Star6 nubwo rishakwa na benshi, arishaka kubarusha.

Mu nshuro esheshatu iri rushanwa rigiye kumara ritangiye, ni ku nshuro ya gatatu Christopher aryitabiriye. Ibi rero ngo binamuha imbaraga zo kuba yamenya uburyo agomba kwitwara akaba yaryegukana.

Mu mwaka wa 2013 nibwo yitabiriye iri rushanwa bwa mbere. Icyo gihe riza kwegukanwa na Riderman aho yari ahanganye na Knowless, Urban Boys ndetse n’itsinda rya Dream Boys ku mwanya wa mbere.

Christopher yabwiye Umuseke ko impamvu avuga ko abahatanira iri rushanwa ari babiri, ari uko we yivanyemo hasigara abandi bahanzi 9 bose bashaka kwegukana iri rushanwa.

Bityo muri abo bose barishaka, igihe hagira uryegukana utari we ashobora kwemera ko yarushijwe kubera ko ari mu irushanwa buri wese afite uburyo agomba kuzitwara.

Yagize ati “Uyu niwo mwaka wanjye wo kwegukana Primus Guma Guma Super Star6. Kuko rirashakwa na benshi ariko muri abo bose sinibaza ko hari undusha kugira inyota yo kuryegukana”.

Imwe mu mpamvu avuga ko yumva yifitiye ikizere cyo kuba yakwegukana iryo rushanwa, ngo ni uko umwaka wa 2015 atabashije kuryitabira. Bityo bikaba bizamufasha kwitwara neza kubera ko afite n’indirimbo abantu bashaka kubona aririmba batari bazi.

Mu ndirimbo avuga ko ishobora kuzamufasha kwigarurira imitima ya benshi mu gihe azaba ahatanira kwegukana iryo rushanwa n’abandi bahanzi mu bitaramo bizazenguruka Intara zose, ni ‘Abasitari’.

Christopher akomeza asaba abakunzi b’ibihangano bye kuzakora uko bashoboye akaba yakwegukana Primus Guma Guma Super Star6 biciye mu mbaraga zabo bazakoresha bamwereka ko bamushyigikiye igihe gutora ku butumwa bugufi ‘SMS’ bizaba bitangiye.

Bruce Melody, Jules Sentore, Urban boys, Christopher, Allioni, Dany Vumbi, Dany Nanone, Gaby Umutare, Young Grace n’itsinda rya TBB nibo bazerekeza i Gicumbi kuri uyu wa gatandatu tariki ya 14 Gicurasi 2016 mu gitaramo cya mbere cy’iri rushanwa mu munani bizaba birigize.

Joel Rutaganda

UM– USEKE.RW