Abahanzi nyarwanda 31 Ally Soudi asanga ari indorerwamo ku bato

Uwizeye Ally Soudi umwe mu banyamakuru bagize uruhare mu kurushaho gukundisha abanyarwanda ibihangano by’abahanzi nyarwanda akaba n’umushyushyabirori (MC) ubarizwa muri Leta Zunze Ubumwe z’Amerika, yatangaje amazina y’abahanzi 31 afata nk’indorerwamo ya bamwe mu bahanzi bato.

Mu magambo yanyujije ku rukuta rwe rwa facebook, Ally Soudi yavuze amazina y’abahanzi bagera kuri 31 abona bagize uruhare runini rwo gutuma abahanzi bato bakura bashaka gutera ikirenge mu cyabo.

Yagize ati “Buriya ni bake muri twe twibuka icyubahiro bamwe mu bahanzi nyarwanda twakuze twumva umuziki wabo bakwiye. Reka tureke abatakiriho.

Ariko se abakiriho ninde wibuka uburyo bari ibyamamare n’ibihangage? Nyuma ya genocide yakorewe abatutsi mu 1994, nakuze numva, ndeba kuri Television, nifuza byibura mu buzima bwanjye kuzabona live cyangwa se gukora ku bahanzi nakundaga.

Hari bamwe bagize amahirwe yo kubabona no kubagira inshuti. Gusa ikijya kimbabaza ni uko twibagirwa vuba indoto twari tubafiteho cyangwa se ubudahangarwa n’ubutwari bwabo muri muzika nyarwanda.

Nshimira Imana yampaye amahirwe yo kumenyana no kuba inshuti na bamwe muri bo, gusa ndanabashimira uruhare mwagize mu guha inspiration benshi mu bahanzi biki gihe. Muri intwari za muzika nyarwanda!”.

Dore urutonde rwashyizwe hanze na Ally Soudi rw’abahanzi bagize uruhare runini mu gutuma abahanzi b’iki gihe barushaho gukunda muzika.

Kamariza, Cecile Kayirebwa, Ben Rutabana, Ben Kayiranga, Jean Paul Samputu, Mavenge Sudi, Anny Gatera, Nyiranyamibwa, Makanyaga Abdul.

Byumvuhore, Sankara, Dj Degaul, Alain Muku, Victoire, Maria Yohana, Patrick Gihana, Massamba Intore, Muyango n’Imitari, Gipeti, Mwitenawe Augustin, Indahemuka.

Amarebe n’ Imena,Minani Rwema, Mihigo Francois Chouchou, Afsana Rahamatali, Might Popo, Masabo Nyangezi, Kagambage Alexandre, Niyomugabo Philemon, JC Matata na Producer Niyitunga Aaron n’abandi benshi.

Joel Rutaganda

UM– USEKE.RW