“Abahanzi bareke ibyo barimo kuko abafana nibo baca urubanza”- TBB

Abahanzi batandukanye mu Rwanda usanga bivuga ibigwi ko barusha bagenzi babo, aho usanga binagenda bikavamo kutumvikana hagati yabo bivuye kuri iyo “Competition”. Ubu bitewe ahanini n’amarushanwa ategerejwe ashingira kubyo bakoze mu 2013 abahanzi bari kwivuga cyane ibyo bakoze. Itsinda rya TBB ryo rivuga ko ukiza uru rubanza ari umufana gusa.

Itsinda rya TBB rigizwe n’abahanzi batatu bishyize hamwe rivuga ko abahanzi bakwiye kureka kurushanwa mu kwivuga ahubwo bakwiye kureka abakunzi babo bakaba aribo bazihitiramo abakwiye amashimwe kubyo bakoze mu 2013.

MC Tino, ukunze kuvugira iri tsinda yabwiye Umuseke ko asaba abahanzi bagenzi be kureka kwirirwa bivuga ibigwi, “ kuko abanyarwanda ndetse n’abakunzi bacu nibo bagomba guca urubanza”.

Muri uyu mwaka hategerejwe amarushanwa y’abahanzi atandukanye ashingira cyane k’uko bitwaye umwaka ushize. Rimwe mu yegereje ni Salax Music Awards rizaba mu mpera za Werurwe 2014, irindi ni irushanwa rya Primus Guma Guma SuperStar, nubwo uyu mwaka ngo rishobora kuzafata izina ry’ikinyobwa cya Turbo nacyo gikorwa na BRALIRWA.

Abahanzi bo mu Rwanda, buri umwe aba afite inyota yo kwegukana igihembo cya Salax cyangwa se kugaragara muri iryo rushanwa ritegurwa na Bralirwa na EAP riba ririmo n’agatubutse.

Muri uyu mwaka wa 2014, itsinda rya TBB rivuga ko rifite gahunda zo gukorana n’abahanzi mpuzamahanga n’abo mu Rwanda mu gukomeza izina ryabo no kumurika album yabo bari gutegura no kwiga ku izina ryayo.

Reba indirimbo bakoranye na Jay Polly bise ‘Vuza Ingoma‘

Joel Rutaganda
ububiko.umusekehost.com