Abafite ubumuga bagiye gushyirwa mu byiciro hagamijwe kubakemurira ibibazo

Kuba umubare nyawo w’abafite ubumuga utazwi, biterwa n’uko nta rutonde rwakozwe n’abahanga rugaragaza urwego n’icyiciro cya buri muntu, bityo no kubagenera inkunga bikagorana.

Mu biganiro yagiranye n’abahagarariye abafite ubumuga bo mu mirenge itandukanye igize akarere ka Kamonyi, Umunyamabanga nshingwabikorwa w’Inama y’Igihuguy’Abafite ubumuga, Ndayisaba Emmanuel, kuri uyu wa gatatu taliki ya 2 Gicurasi, yabatangarijeko gahunda yo gushyira mu byiciro abafite ubumuga yegereje kugirango buri wese muribo ajye abona ibyo agenerwa.

Ishyirwa mu byiciro ry’abafite ubumuga ngo rikaba rizakorwa n’abaganga babifitiye ubumenyi, akaba aribo bazemeza ubumuga umuntu afite n’icyiciro abarizwamo.

Abafite ubumuga bakazakorerwa ubukangurambaga bwo kwitabira iyo gahunda izabera ku mirenge yabo. Icyo cyemezo kikaba cyarafashwe na Minisiteri y’ubuzima.

Abitabiriye ibyo biganiro bishimiye kuba hagiye kubaho iyo gahunda yo kubashyira mu byiciro kuko bizabafasha kumenya buri wese icyo akeneye gihuye n’ubumuga afite maze no kumukorera ubuvugizi bikorohera abamukuriye.

Nyabyenda Justin, umuhuzabikorwa w’abafite ubumuga bo mu murenge wa Nyamiyaga, avuga ko icyo gitekerezo cya Minisiteri y’Ubuzima ari cyiza kuko hari abantu bajyaga bivanga mu bafite ubumuga cyane cyane nk’igihe habonetse ubufasha, maze bakitwazako bafite ubumuga butagaragara.

Umubare w’agateganyo w’abafite ubumuga mu Rwanda bashingiye ku ibarura ryakozwe mu mwaka wa 2010, Ndayisaba avuga ko ugera ku bihumbi Magana atanu na makumyabiri n’umunani. Bakaba bazashyirwa mu byiciro hakurikijwe ubu mugaba bafite nyuma yo gusuzumwa n’abaganga.

UM– USEKE.COM