Abacuruzi bafite impungenge ko imashini bahawe RRA zizabahombya

Kuri uyu wa kabiri tariki 30 Mata2013, ikigo cy’Igihugu gishinzwe imisoro n’amahooro, Rwanda Revenu Authority, cyatangaje ko n’ubwo kimaze gutanga imashini zigera kuri 500 zifashishwa mu bucuruzi bakanigisha uko zikoreshwa ngo bamwe mu bacuruzi ntibarasobanukirwa bihagije ku buryo bakizifiteho impungenge.

Abacuruzi benshi bo bavuga ko bafite impungenge ko izi mashini zizabahombya kuko badasobanukiwe neza uburyo zikora, kuri iyi ngingo RRA ivuga ko ibi bigaragaza ko abacuruzi bataramenya akamaro kazo.

Ushinzwe ikoreshwa ry’izi mashini Placide Kibogo avuga ko gukoresha izi mashini bizazanira abacuruzi inyungu ndetse n’abishura imisoro na bo bakabyungukiramo.

Avuga ko kugira ngo iyi gahunda ize, byatewe nuko ikigo cy’imisoro n’amahoro cyahuraga n’imbogamizi zitandukanye mu gutanga inyemeza buguzi aho bamwe banyerezaga imisoro ntiberekane inyemezabuguzi zakoreshejwe. (Mu gihe cya Audit)

Agira ati”Hari bantu benshi badatanga za ‘facture’ ku baguzi kandi ibyo binyereza imisoro buri gihe ndetse ari n’abandi bageragezaga guhisha inyemeza buguzi ku byacurujwe ibi byose nibyo byatumye guverinoma ifatanyije na RRA bafashwe ingamba zo gukumira ibibazo byagaragaraga ku misoro y’injiraga mu isanduku ya leta”.

Akomeza avuga ko ibi byanatezaga igihombo ku bacururuzi bitewe n’uko bamwe batanga umusoro abandi ntibawutange bagakoresha bityo abawutanze bakabihomberamo.

Kibogo avuga ko inyungu bazabonamo nka RRA n’uko bazaba bafite uburyo bwo kumenya ibikorwa byabaye ku bacuruzi ndetse no kugabanya magendu.

Ubu buryo si u Rwanda gusa rurimo gutangiza bwatangiyeno gukoreshwa mu bindi bihugu bya baturanyi birimo Tanzania,Kenya na Ethiopie.

Gusa aho u Rwanda rutandukaniye n’ibindi bihugu bitandukanye mu ikoreshwa ry’izi mashini n’uko nko muri Kenya bazikoresha mu kugira ngo bamenye amakuru aho bisaba kohereza yo umukozi akitwaza ka “Memory Card” kugira ngo ajye kuzana amakuru y’ibyakozwe n’umucuruzi.

Mu gihe mu Rwanda ho zikoreshwa kugira ngo zitange amakuru ku bakozi ba RRA batarinze kujya kureba abacuruzi bitewe n’uko iba ifite umurongo wa internet ihuriyeho n’abo kuri RRA.

Inyungu iri muri ibi n’uko umuntu wese ukora muri ubu buryo akora mu mucyo, icyo gihe inyerezwa ry’imisoro rizagabanuka ndetse umusoro w’injiraga mu isanduku ya leta uziyongera.

Ku bantu bashaka gucuruza iyo mashini’ Electronic billing machines’ bashobora kugana RRA kugira ngo zizagenzurwe, kuko ntabwo zizajya zitangwa na RRA yonyine dore ko n’abashaka gushoramo imari mu kuzicuruza imiryango ifunguye nkuko RRA ibitangaza.

Gusa icyo basabwa ni ukuzana izo mashini zikabanza kugenzurwa niba zuzuje ibisabwa baka bashyira ku rubuga rwabo kugira ngo umuntu wese azabagane.

RRA ivuga ko yashyizeho iyi gahunda kugira ngo bizafashe kongera umuco wo gusaba inyemezabuguzi kuko umuco wo gusaba inyemezabuguzi atarinjira mu banyarwanda neza.

Iki kigo kandi kivuga ko mu minsi iri imbere umucuruzi uzerekana ubushake buke bwo gukoresha iyi mashizini azahanwa n’ubwo ibihano bitarashyirwa ahagaragara.

Daddy SADIKI RUBANGURA
UM– USEKE.COM