Ababiligi babiri bahawe ubwenegihugu bw’u Rwanda

Kuri uyu wa 22 Kamena, kuri Ambasade y’u Rwanda mu Bubiligi, Ambasaderi w’u Rwanda muri icyo gihugu Olivier Nduhungirehe n’abajyanama be bakiriye indahiro z’Ababiligi babiri bahawe ubwenegihugu bw’u Rwanda.

Uyu muhango watangijwe no kuririmba indirimbo y’igihugu ‘Rwanda Nziza’, abari bagiye kurahira bafatanya n’abandi bantu bari bitabiriye uyu muhango kuyiririmba.

Hanyuma, Madame Philomène Bagunda Nyamvura na Cauchie Roger Edmond Ghislain barahira bafashe ku idarapo ry’u Rwanda. Aba bombi bahawe ubwenegihugu bw’u Rwanda, basanzwe barashakanye n’Abanyarwanda.

Philomène Bagunda Nyamvura na Cauchie Roger Edmond Ghislain bombi banafite ubwenegihugu bw’Ububiligi, kandi bemerewe kubugumana kuko u Rwanda rwemera kugira ubwenegihugu burenze bumwe.

Ambasade y’u Rwanda mu Bubiligi dukesha iyi nkuru, iravuga ko aba bombi bakurikije inzira zagenwe n’itegeko rigenga gusaba ubwenegihugu bw’u Rwanda, barabusaba kandi bakora ikizami ku muco rusange w’u Rwanda.

Muri uyu muhango, Ambasaderi w’u Rwanda mu Bubiligi Olivier Nduhungirehe yibukije abarahiye n’abari bitabiriye uyu muryango muri rusange indangagaciro z’igihugu, n’Intego kigenderaho “Ubumwe, Umurimo no Gukunda igihugu.”

Ijambo rye, ryashingiye cyane kuri izi Ntego z’igihugu, ku birebana n’Ubumwe, Amb. Nduhungirehe yagarutse ku mateka mabi ya Jenoside yakorewe Abatutsi u Rwanda rwanyuzemo mu 1994.

Nduhungirehe yibukije ko nubwo Abanyarwanda bari basangiye ubutaka, bahuje ururimi ndetse n’umuco, hari igihe igihugu cyari kigiye gucikamo ibice kubera ingengabitekerezo ya Jenoside.

Ati “Ibyari ibyiciro by’imibere by’abaturage mu gihe cy’ubwami byaje guhindurwa amoko ndetse bikoreshwa nabi n’ubuyobozi bw’abakoloni ndetse n’ubutegetsi bugendera ku moko bwabasimbuye. Icyo byatanze murakizi. Ndabibutsa nk’abantu bashya mu muryango nyarwanda guharanira ubumwe bw’igihugu, no kurwanya ivangura iryo ariryo ryose n’ingengabitekerezo ya Jenoside.”

Ambasaderi Nduhungirehe kandi yibukije aba Banyarwanda bashya ko u Rwanda nk’igihugu kidafite amabuye y’agaciro menshi, ejo hazaza hacyo hashingiye ku bumenyi no gukora cyane kw’Abanyarwanda.

Mu ijambo rye kandi, Ambasaderi yagarutse ku Gukunda igihugu, aho yagize ati “Mumaze kubona ubwenegihugu bw’u Rwanda, ariko impapuro muhawe si itangiriro si n’iherezo ry’ubunyarwanda tubitezeho. Kuba umunyarwanda, ni ugukunda u Rwanda.”

Nduhungirehe kandi yabanyuriyemo ku byerekeranye n’imiyoborere na Demokarasi y’ubwumvikane u Rwanda rwahisemo aho guhangana, n’ibindi.

Ati “Kuba Umunyarwanda kandi ni ukwiyemeza gukorera u Rwanda no kuba warwitangira bibaye ngombwa. Kuba umunyarwanda ni ukubaho wihesha Agaciro. U Rwanda ni igihugu gito cyo muri Afurika, igihugu gikennye nk’uko babivuga, ariko turi igihugu mbere ya byose cyiyizeye kandi gitumbereye kwigira.”

Mu gusoza ati “Murakaza neza mu muryango nyarwanda”, kandi abashishikariza kwiga Ikinyarwanda kuko ngo aribwo buryo bwihuse bwabafasha kwisanga byihuse mu muryango Nyarwanda.

UM– USEKE.RW