Aaron Niyitunga abona umuziki gakondo urimo gucika

Ubusanzwe amazina ye ni Aaron Nitunga gusa abenshi bakaba bakunda kumwita “Tunga wa Tunga”. Ni umwe mu ba Producers bakomeye cyane mu Rwanda ndetse no mu Karere. Kuri we avuga ko abona muzika gakondo igenda icika ahubwo hamenyekana inyiganano.

Yakunze kubarizwa cyane muri Canada rimwe na rimwe akaba no mu Bubiligi nyuma aza kuza mu Rwanda ariko abanje no kuba muri Kenya. Aho hose niho yakuye bumwe mu buhanga akunze kuvugwaho mu mikorere ye y’indirimbo.

Nk’umwe mu ba Producers bakomeye kandi bubashywe cyane mu Rwanda, asanga umuziki urimo gutera imbere ariko muri rusange muzika gakondo ikagenda yigizwayo.

Ngo ibi rero ntabwo umuntu yavuga ko hari iterambere mu muziki mu gihe ibyawe urimo gushaka ko bisibangana ahubwo ukimakaza ibitari ibyawe bwite.

Yagize ati “Umuziki wo mu Rwanda uri gusubira inyuma cyane kuko abawukora ubu mu Rwanda baretse umuziki nyarwanda bari gukora umuziki w’ahandi.”

Yakomeje atangariza Umuseke ko abahanzi bakora umuziki wo muri Amerika cyangwa se wo mu bindi buhugu byo mur Afurika, badashobora gutera imbere kubera ko biganye ibyo abandi bakoze. Ahubwo ko bakagumye ku njyana gakondo ikaba nk’irangamuntu yabo.

Aaron avuga ko abona bipfira aho abahanzi cyangwa aba produces bamwe na bamwe nta mwanya bagifite. Bose bari gukora ibintu biboroheye, bariyambaza mudasobwa byose bakaba ariho babikorera ku buryo ntacyo bakora kiri umwimerere wabo

Noneho akabona icyabikemura ari uko abana bakibyiruka bakwiye kubegera bakabereka ko umuziki nyarwanda nawo ushobora kugurishwa kandi ugakundwa nk’uko uw’Abanyamerika ukunzwe.

Yakoze zimwe mu ndirimbo zikomeye zirakundwa cyane, nka “Nama ntangara” y’Umurundi Appollinaire, “Nimuze tubyine” ya Samputu n’izindi.

Joel Rutaganda

UM– USEKE.RW