Peru: Undi mukinnyi yaguye mu kibuga arapfa

Umukinnyi Yair Jose Clavijo Panta  w’imyaka 18 wo mu gihugu cya Peru yitabye Imana aguye mu kibuga ku cyumweru ubwo ikipe akinira ya Sporting Cristal yakinaga umukino wa shampiona na Real Garcilaso ku kibuga cya Cuzco, aya makipe yombi abarizwa mu kiciro cya mbere cya shampionat y’umupira w’amaguru yaho.

Yair Jose Clavijo Panta  yagize ikibazo cy’indwara y’umutima ubwo yari mu kibuga bimuviramo kwitaba Imana mu masaha macye cyane kuko yavuye mu kibuga nta mwuka ukimurimo.

Amakuru dukesha Gol TV nuko uyu mukinnyi yaguye mu kibuga nyuma y’iminota 5 gusa umukino utangiye.

Iyi ndwara ye y’umutima yamuviriyemo no gupfa yatewe ahanini n’ubutumburuke bukabije dore ko ikibuga bakiniragaho kiri kuri 3500m z’ubutumburuke.

Gustavo Zevallos umutoza wa Sporting Crystal yagize ati “ubutabazi bwaje bwangu gusa nta bikoresho byongera umwuka bari bafite kandi nibyo byari ngombwa kugira barebe niba batabara ubuzima bwa Clavijo.”

FIFA yasabya ishyirahamwe ry’umupira w’amaguru muri Peru gukwirakwiza ibikoresho byongera umwuka abakinnyi  kuri buri kibuga, FIFA kandi ikangurira amashyirahamwe yose kw’isi gushyira ibyo bikoresho kuri buri kibuga cyose cy’umupira w’amaguru.

JD Nsengiyumva Inzaghi
UM– USEKE.RW