Kampala: Igorofa yahirimye ihitana abantu bane

Amakuru atangazwa na polisi mu gihugu cya Uganda aravuga ko abantu 4 aribo bapfuye ubwo inzu yagwaga mu mujyi wa Kampala mu gitondo cyo kuri uyu wa mbere.

Polisi ikomeza ivuga ko abantu umunani bakomeretse ku buryo bukomeye nyuma yo kugwira n’inzu ahitwa Magoba Arcade mu mujyi wa Kampala nk’uko bitangazwa na Chimpreports.

Ubu abakomeretse bajyanwe mu bitaro bikomeye mu mujyi wa Kampala byitwa Mulago National Referral Hospital.

Umuvugizi wa polisi ya Uganda, Ibin Ssenkumbi yemeje ayo makuru atangaza ko ishami rishinzwe kuzimya inkongi, rigishakisha abarokotse.

Ssenkumbi ati “Bane bapfuye ariko haracyashakishwa abandi.”

Gusa uyu muvugizi wa polisi yirinze kugira byinshi atangaza ku cyaba cyateye iyo nzu kugwa. Kuri ubu ntawe uzi icyateye iyo mpanuka.

HATANGIMANA Ange Eric
UM– USEKE.RW