Peace Cup: Bugesera yatunguye AS Muhanga Muri 1/2

Irushanwa ry’igikombe cy’amahoro riterwa inkunga n’umushinga Imbuto foundation mu rwego rwo kurwanya Malaria imikino ibiri ibanza ya 1/2 yarangiye ikipe za APR FC na Bugesera zitahukanye intsinzi, imikino yose ikaba yarabereye kuri Stade ya Kicukiro muri week end ishize.

Kuwa gatandatu ikipe ya APR FC yakinnye n’ikipe ya AS Kigali, APR itsinda igitego kimwe ku busa cyatsinzwe n’umukinnyi Bayisenge Emery kuri penaliti ku munota wa 13 w’umukino ku ikosa ryari rikorewe rutahizamu  Sekamana Maxime.

Uyu mukino ukaba wararanzwe no kwiharira umupira kw’ikipe ya APR benshi bavuga ko ifite imbere heza kuko ari ikipe igizwe n’abana bakiri batoya bavuye muri academy ya APR.

Ku ruhande rw’ikipe ya AS Kigali umutoza Cassa  akaba atangaza ko nta mpugenge nyinshi yatewe no gutsindwa uyu mukino kuko afite amahirwe menshi yo kuzatsinda umukino wo kwishyura ngo nubwo APR ariyo izaba yakiriye.

Ikipe ya Bugesera ikomeje gutungurana muri iki gikombe benshi  bavuga ko ishobora kwandika amateka nka ya Wigan mu Bwongereza , Bugesera yatunguye AS Muhanga ya Ali Bizimungu iyitsinda igitego kimwe ku busa.

Iyi kipe kandi itwaye igikombe cy’amahoro ikaba yaba yanditse amateka kuko yabona itike yo kuzahagarira u Rwanda muri CAF Confederation Cup, amarushanwa nyafrika yaba akinwe bwa mbere n’ikipe yo mu kiciro cya kabiri mu Rwanda.

Imikino yo kwishyura ikaba iteganyijwe nyuma y’ibyumweru bibiri gusa.

JD Nsengiyumva Inzaghi
Umuseke.rw