Ndago: Inka yatemwe n’abantu bataramenyekana

Mu Mudugudu wa Gitovu , Akagali ka Ndago, Umurenge wa Rusarabuye mu Karere ka Burera  ho mu Ntara y’Amajyaruguru inka y’umuturage witwa Nyiransabimana Vestine yatemwe n’abagizi banabi bataramenyekana.

Umuyobozi w’Akarere ka Burere ushinzwe Ubukungu n’Iterambere Zaraduhaye Joseph, avuga ko ibikorwa nk’ibi birimo kugaragara mu Mirenge ya Rusarabuye, Butaro na Rwerere.

Ubuyobozi bw’aka karere kandi burakangurira abaturage kwirinda amakimbirane n’imyumvire mbi ngo kuko ari byo ntandaro y’ibikorwa nk’ibi bibyara kwica.

Muri uyu Murenge wa Rusarabuye kandi ngo hamaze iminsi hagaragara ibikorwa nk’ibi aho mu minsi ishize hari umutarage waranduriwe imyaka undi bakamutemera inyanya.

Zaraduhaye avuga ko ibi biterwa n’amakimbirane agaragara hagati y’abaturage aho usanga umwe atishimira ko undi atera intambwe kandi we agikennye, akagurisha umusaruro w’amatungo  nta gire icyo amumarira.

Akomeza avuga ko ubuyobozi burimo gukurikirana abakoze iki gikorwa bagerageza no gukangurira abaturage kugira ngo bareka imyumvire nk’iyi.

Avuga kandi ko iyo habayeho igikorwa nk’iki kiba kivuye ku burangare bw’irondo, abaturage bose bateranya amafaranga maze bakagura indi nka.

UM– USEKE.RW