Lil G agiye gushyira ahagaragara amashusho y’indirimbo 'Imbabazi'

Mu gihe hari hamenyerewe ko umuhanzi amurika album, kuri ubu Umuhanzi , akaba n’umunyeshuri mu mashuri yisumbuye Karangwa Lionel uzwi ku izina rya ‘Lil G’ yateguye igitaramo cyo kumurika amashusho y’indirimbo ‘Imbabazi’ yakoranye na Mani Martin.

Iki gitaramo kizabera muri ‘New Bandal’ hirya gato ya Alpha Palace tariki 18/05/2013 guhera ku isaha ya saa tatu za nijoro.

Iki gitaramo cyo kumurika indirimbo ‘Imbabazi’ ngo nta wundi  muhanzi uzakigaragaramo aririmba.

Mu kiganiro na Lil G twamubajije impamvu yahisemo kuba ari we muhanzi wenyine ugaragara muri iki gitaramo dore ko bisanzwe bimenyerewe ko abandi bahanzi batumira bagenzi babo ngo babafashe mu bikorwa nk’ibi .

Mu magambo ye Lil G yagize ati : “ Numvaga nifuza kuba ndi kumwe na Mani Martin kubera ko ari we twakoranye indirimbo ariko kubera gahunda nyinshi afite mu bintu bya ‘culture’ ntibyakunze. Ni igitekerezo nagize cyo kuzaba ndi kumwe na we ariko ntibyashobotse… “.

Yakomeje atubwira ko atashatse gutumira abandi bahanzi mu rwego rwo kugira ngo bibe umwihariko w’indirimbo ‘Imbabazi’ kandi abone umwanya wo kwisanzura n’abakunzi ba muzika ye.

Lil G usanzwe amenyerewe mu njyana ya hip hop, yamenyekanye cyane kubera indirimbo ye ‘Nimba umugabo’ yakoranye na Meddy akaba yarayikoze akiri umwana muto, akaba ari nayo yitiriye Album ye ya mbere.

Uyu musore azwi cyane mu indirimbo zitandukanye nka Nimba umugabo, Akagendo, Agaciro n’izindi zitandukanye.

Imani Rabbin
UM– USEKE.RW