Mahoko: Barinubira ibicuruzwa bifite umwanda ukabije

Abaturage bakora imirimo y’ubucuruzi muri santeri ya Mahoko bakomeje kwinubira imwe mu myitwarire y’abacuruzi bagenzi ba bo bacuruza ibijyanye n’amafu y’imyumbati, ibigori, amasaka n’ibindi ngo kuko  usanga ibi biribwa  bifite umwanda ukabije.

Bavuga ko ibyinshi muri byo bicururizwa mu muhanda rwagati,imodoka zatambuka ugasanga bisigayeyo ivumbi, amafu yo ngo yivanga n’umukungugu hanyuma bakagurisha abaturage.

Kwinuba, kwivovota no guterana amagambo hafi no gufatana mu mashati nibyo biri kugaragara  muri iyi santeri  ya Mahoko  ku muhanda werekeza mu Murenge wa Nyabirasi, ariko uyu muhanda ukaba unyura hagati y’amazu y’ubucuruzi, unanyuramo imodoka nyinshi zitumurira  umukungugu muri ibi biribwa.

Aha n’abacururiza muri za butiki  bavuga ko baza  mugitondo bambaye imyenda isa neza  bagataha  yabaye umweru kubera ifu yirirwa ibatumukira.

Kubera uyu mukungugu usanga abacuruzi n’abaguzi baterana amagambo, abaguzi  bavuga ko baba gurisha  ifu yuzuye imisenyi bamwe bakavuga ko byatumye abana babo baburara.

Umucuruzi ukora ubucuruzi bwa materefoni utarifuje ko amazina ye atangazwa yavuze ko batakambiye ubuyobozi bw’Umurenge ntibyagira icyo bitanga yagize ati:”Twirirwa duhanganye, duterana amagambo n’abacuruza amafu bitewe n’uko batumurira ifu mu bicuruzwa byacu wibaze nawe buri minota mirongo itatu duhanagura terefone ziba zuzuyemo ifu”.

ikindi kandi ni nako tuba dukiranura abashyamiranye, aturuka k’ubufu burimo  amabuye n’umusenyi tukaba dusaba ubuyobozi kuturenganura, ifu  ntiyegerane n’amabutiki n‘utubari.

Twifuje kumenya icyo ubuyobizi bw’Umurenge wa Kanama bubivuga ho  umunyamabanga Nshingwabikorwa w’uyu Murenge Sebikari Munyanganizi Jean avuga ko ikibazo bakizi ariko bari gushaka aho bazimurira abo bacuruzi.

Akomeza avuga ko babanje kubakoresha inama kugira ngo babibumvishe neza anabasaba kutabangamirana ababwira ko mu gihe  gito ibibazo bizakemuka .

MAISHA Patrick
UM– USEKE.RW