Ingendo z’indege za 'Turkish Airlines' mu Rwanda zishobora guhura n’ibibazo

Kuva ku itariki 15 Gicurasi 2013 abakozi b’indege z’ikompanyi ya Turkish Airlines barateganya guhagarika akazi ku mpamvu z’ubwumvikane buke n’abakoresha babo kubijyanye ahanini n’imishahara mishya, bikaba bishobora kuzagira ingaruka ku ngendo z’izi ndege ku isi yose harimo n’izigana mu Rwanda.

Babinyujije ku rubuga rwa ‘internet’ rwabo, Urugaga rugizwe n’abakozi 90% b’ikompanyi Turkish Airlines ruzwi nka “Hava-Is union” rufite icyicaro mu gihugu cya Turkiya batangaje ko tariki 15 Gicurasi 2013 bazahagarika akazi kugira ngo abakoresha babo bubahirize ibyo basaba kuko babona ntagikorwa kugira ngo ibyifuzo byabo byubahirizwe.

Aba bakozi bavuze ko bashaka guhagarika akazi kuko basanga umushahara wabo tagihaza ibyo bakenera mu buzima bwabo bwa buri munsi, bakaba basaba kongezwa 10% by’umushahara n’amadorali 111 kuri buri mukozi.

Barasaba kandi kugarura abakozi 305 birukanywe bazira ko bivumbuye ku mushinga w’itegeko ribabuza guhagarika kazi cyangwa kwigaragambya igihe bibaye ngombwa ndetse no guhindura imiterere y’abakozi bakajya bakora igice cy’umunsi (Part-time).

Nk’uko tubikesha urubuga online.wsj.com, ubuyobozi bw’iyi kompanyi bwemera kubongera 6%  ariko nayo ntibayabahere rimwe ahubwo bakabanza kubaha 3% mu gice cya mbere cy’umwaka n’indi gatatu ku ijana (3%) nyuma.

Icyako aba bayobozi bakaba bavuga ko bifuza gukomeza kugirana ibiganiro n’urugaga rw’abakozi kugira ngo haboneke umuti bidateje impagarara.

Urubuga rwandan-flyer.com rwo ruravuga ko hari amakuru rufite ko guvernoma ya Turkiya ishobora gukora uko ishoboye igahagarika uku kwivumbura kubura amasaha 48 ngo gukorwe n’abo bakozi, maze rukagira ingaruka ku ngendo za Turkish Airlines ku Isi hose.

Kuva kuwa 15 Gicurasi 2012 kompanyi ya Turkish Airlines yatangije ingendo zigana mu Rwanda, indege zayo zigwa zikanahaguruka mu Rwanda (Istanbul   > Kigali >  Istanbul ) inshuro enye mu cyumweru.

Vénuste KAMANZI
UM– USEKE.COM