Impanuka ikaze ku Giti cy’Inyoni

Kuri uyu wa gatandatu  kuwa 7 Gicurasi ku mugoroba ahagana mu masaha ya saa kumi n’ebyiri z’umugoroba nibwo ahazwi ku izina rya Giti cy’Inyoni hafi y’umugezi wa Nyabarongo, habereye impanuka ikaze yahitanye abantu 14 abandi 2 barakomereka bikabije.

Iyi mpanuka yakozwe n’imodoka ebyiri imwe yo mu bwoko bwa TOYOTA Hiace ikora akazi ko gutwara abagenzi  n’ikamyo nini zombi zikaba zerekezaga i Muhanga.

Iyi modoka yo mu bwoko bwa Toyota Hiace  yashatse guca kuri iyi camion, iyigeze imbere nibwo camion yahise iyigonga maze igita mu gishanga cya Nyabarongo. Camion yayo yahise ibura uko ihagarara ita umuhanda nayo yerekeza mu gishanga aho yahise igwa hejuru ya ya Hiace.

Nkuko tubikesha Umunyamakuru w’Umuseke.com uri aho iyi mpanuka yabereye, abantu 14 nibo bamaze kwitaba Imana naho abandi 2 bakomeretse bikabije ariko bakaba berekejwe kwa muganga aho barimo gukurikiranirwa hafi n’abaganga. Ikindi twabatangariza nuko iyi mpanuka ikimara kuba habuze ibi modoka binini bimwe biterura izindi bizwi ku izina rya Break downs byo gukuramo abantu hagamijwe kureba niba hari abakorerwa ubutabazi bakaba barokoka, bigoranye ndetse hashize iminota itari mike nibwo Break down ya MAGERWA yahageze maze ibasha gukurura izi modoka bityo inkomere zerekeza iy’ibitaro.

Turakomeza kubakurikiranira  amakuru yerekerenye n’iyi mpanuka, tunaboneyeho n’umwanya wo kwihanganisha imiryango yaburiye abayo muri iyi mpanuka.

Umuseke.com