Guinea: Umugaba Mukuru w’Ingabo yaguye mu mpanuka y’indege

Abasirikare icumi barimo Umugaba Mukuru w’Ingabo za Guinea bitabye Imana bazize impanuka y’indege yabereye mu gihugu cya Liberia.

Kugeza ubu amakuru atangazwa na BBC aravuga ko nta muntu n’umwe warokotse iyi mpanuka nubwo umubare nyawo w’abari muri iyi ndege utashyizwe ahagaragara, gusa bamwe mu bantu bari hafi ya perezida wa Guinea Alpha Conde baravuga ko iyi ndege yarimo abasirikare 18.

Abapfuye ni abayobozi bakuru mu bya gisirikare bari bitabiriye inama ngarukamwaka yiga ku buryo imitwe yitwaje intwaro yarwanywa.

Iyi ndege yaguye ahitwa i Charlesville hafi n’Ikibuga cy’Indege cya Monrovia nk’uko byatangajwe na Minisitiri ushinzwe Itangazamakuru muri Liberia, gusa icyatumye iyi ndege ikonkoboka igahitana ubuzima bw’aba basirikare ntikiramenyekana kugeza magingo aya.

Ubwo yatangizaga iyi nama, Perezida w’Igihugu cya Liberia, Madamu Ellen Johnson Sirleaf yasabye abari bayiteraniyemo gufata umwanya bakibuka aba basirikare baguye muri iyi mpanuka.

Umuvugizi w’Igisirikare cya Guinea Alpha Barry nawe yemeje ko Umugaba Mukuru w’Igisirikare Gen Souleymane Kelefa Diallo yaguye muri iyi mpanuka.

INKINDI Sangwa
UM– USEKE.COM