Shampiyona y’u Rwanda igeze ahakomeye

Shampiyona y’ikiciro cya mbere mu Rwanda Prumus National Ligue, yari yongeye gukomeza kuri uyu wa gatatu. Umukino wasaga n’ukomeye ukaba wabereye kuri Stade Kamena I Huye aho ikipe ya Mukura Victory Sport yari yakiriye ikipe ya Rayon Sport, umukino warangiye amakipe aguye miswi 1-1.

Umukino watunguranye ni umukino wabereye kuri Stade Regional I Nyamirambo, aho amakipe ya gisirikare, ikipe ya APR FC na FC Marines zari zahuye. Ikipe ya APR FC itorohewe n’imikiono ikomeye ifite mu minsi igiye kuza, dore ko izakina umukino wa Shampiyona na Police FC muri week end, nyuma mu yindi week end ikazakina n’ikipe ya Etoile du Sahel yo muri Tunizia yihariye umukino.

Nyamara ikipe ya FC Marines igizwe n’abakinnyi bakiribato, yaje gusa n’iyihagararaho mu gice cya mbere, ku buryo butunguranye itsinda igitego gifungura amazamu, igitego cy’umukinnyi Amir Bitenderi ariko bidatinze umukinnyi wa Marines Bizimana Sadam yitsinze igitego cyo kwishyura, maze igice cya mbere cy’umukino kirangira ari 1-1.

Igice cya kabiri APR yaje gukomeza kwerekana ko ikeneye kugaragariza abakunzi ko yiteguye kuzakina imikino ikomeye mu minsi iri imbere, maze bidatinze ikora amateka yo gutsinda ibitego byinshi muri uyu mwaka ubwo yatsindaga ibitego 6 mu gice cya kabiri. Umukino urangira APR FC ifite 7-1 cya Marines. Abatsinze ibitego, Iranzi, Olivier Karekezi, Lionel, Papy, Wagaruka na Kipson.

Umutoza wa APR FC, Ernie Brandts akaba yadutangarije ko instinzi akuye kuri Marines, izatuma akomeza kwitwara neza mu mikino itaha.

Brandts yagize ati “Ndishimye, twahushije ibitego byinshi, ariko nyuma abakinnyi baza bifitemo ikizere cyo gutsinda barabikora. Ubu tugiye kwitegura Police FC nyuma tuzakine na Etoile du Sahel”.

Gusa uyu mukino wahuzaga APR FC na FC Marines waranzwe no kubura abafana aho abafana bari hagati ya 350 na 500 aribo bari bitabiriye kureba umukino.

Uko imikino yarangiye bikaba byahinduye urutonde rwa Shampiyona rwari rusanzweho. Ubu Police FC nyuma yo gutsinda Etincelles 1-0 i Rubavu, yasubiye ku mwanya wa mbere, ikurikiwe na Mukura VS, APR FC na Rayon Sport.

Umwe mu mikino yaraye ibaye, ugatungura ni aho  Isonga yahagaritswe umuvuduko nyuma yogutsinda amakipe akomeye, ikaba yanganyije  n’Amagaju 1-1.

HATANGIMANA Ange Eric
UM– USEKE.COM