BREAKING: Yanga Africans yasezeye Haruna Niyonzima ku mugaragaro

Bidasubirwaho Haruna Niyonzima yananiranywe na Yanga Africans yo muri Tanzania yakiniye imyaka itandatu ishize. Umunyamabanga w’iyi kipe yatangaje ko abakunzi bose ba Yanga bamwifuriza ishya n’ihirwe mu ikipe azakinira umwaka utaha.

Mu gitondo cyo kuri uyu wa gatatu tariki 21 Kamena 2017 nibwo itangazo ryatunguye benshi ryanyuze ku mbuga nkoranyambaga za Yanga Africans ryemeza ko kapiteni w’ikipe y’igihugu Amavubi Haruna Niyonzima atari mu bakinnyi iyi kipe yatwaye igikombe cya shampiyona muri Tanzania izakoresha umwaka utaha.

Bivugwa ko nyuma y’umukino ikipe y’igihugu y’u Rwanda Amavubi yatsinzwemo na Central African Republic tariki 11 Kamena, Haruna Niyonzima yahise atangira ibiganiro n’amakipe amwifuza arimo ayo muri Tanzania. Ngo Yanga Africans yamubwiye ko amafaranga ya ‘recrutement’ miliyoni 40 frw ariyo menshi bamuha. Nyamara ngo Simba SC nayo baganiriye yo yiteguye kumuha miliyoni 90frw.

Nyuma yo kunanirwa kumvikana ku mafaranga n’ikipe yakiniye imyaka itandatu ishize kuko yageze muri Yanga Africans muri 2011, umwanzuro wo kumusezeraho wamaze gufatwa.

Umunyamabanga wa Yanga Charles Boniphace abinyujije ku rubuga  rwa Facebook rw’ikipe yagize ati: “Nifuje kumenyesha abanyamuryango ba Yanga Africans, abakunzi n’abafana b’umunyarwanda Haruna Niyonzima wari umaze imyaka itandatu adukinira ko nubwo Haruna agifitiye Yanga amasezerano azarangira muri Nyakanga, ariko ntituzashobora gukomezanya nawe umwaka utaha w’imikino kuko tutashoboye kumvikana mu biganiro twagiranye ku bijyanye no kongera amasezerano.

Tumwifurije ishya n’ihirwe mu buzima no mu mupira w’amaguru muri rusange”

Haruna Niyonzima yazamukiye muri Etincelles muri 2005, ajya muri Rayon sports 2006-2007, ayivamo ajya muri APR FC 2007-2011.

Nyuma asinyira Yanga Africans arimo asezera ayihesheje ibikombe birindwi mu myaka irindwi birimo; Ibikombe bya shampiyona bine: 2012–13, 2014–15, 2015-16, na 2016-17. Yayitwayemo kandi igikombe kimwe cy’igihugu 2016, na CECAFA Kagame Cup ya 2012.

Roben NGABO

UM– USEKE