Gatenga Gymnastic Club yagaragaje ubuhanga buhanitse mu irushanwa ryo kwibuka
Ishyirahamwe ry’umukino wa Gymnastique mu Rwanda (FERWAGY) yateguye irushanwa ryo kwibuka, abana bo mu Gatenga bazwiho ubuhanga muri ‘acrobatie’ nibo bahize abandi.
Kuri uyu wa gatandatu tariki 17 Kamena 2017 nibwo irushanwa mpuzamahanga rya Gymnastique ryahariwe kwibuka abazize Jenoside yakorewe Abatutsi mu Rwanda 1994.
Iyi myiyereko yabereye i Rubavu ku kibuga cya Vision Jeunesse Nouvelle yitabirwa n’amakipe ane yo mu Rwanda n’atatu yo muri DR Congo.
Imyitozo ngororamubiri itangaje, kuriranaho byitwa kubaka pyramide, kugendera ku magare maremare y’ipine rimwe, n’ibindi byinshi ni bimwe mu byaranze iri rushanwa ku makipe yaryitabiriye arimo; Jeunesse Nouvelle y’i Rubavu bita Hirondele Gymnastic Club, Eagle Acrobatic y’i Muhanga, Les Etoiles de l’Acrobatie ya Bugesera, Gatenga Don Bosco n’andi yaturutse i Goma nka; Umoja Club, Nganji Club na Mont Goma Club.
Umuyobozi wa FERWAGY, padiri Turabanye Jean Pierre yishimiye urwego iyi mikino igezeho mu Rwanda. Nyuma y’irushanwa yatangaje ati:
“Ni ibyishimo kubona amakipe arenga arindwi (7) akina Gymnastique yahuriye hamwe ngo dufatanye kwibuka abacu. Ni ibyishimo kandi kuko uyu umukino ushimisha cyane abawureba ariko turacyagerageza kubaka ngo umenyekane kurushaho. Irushanwa ryadufashije gutera intambwe yo kwegera abakunzi bawo. Mu irushanwa twakoreye mu Burengerazuba ariko turitegura andi marushanwa mu zindi ntara kuko impano muri Gymnastique ziri mu mpande zose z’igihugu”
Ukwezi kwa Kamena kwahariwe kwibuka abazize Jenoside mu mashyirahamwe y’imikino mu Rwanda. Iyo niyo mpamvu FERWAGY yahuje aya makipe ngo bazirikane abo yabuze muri 1994.
Uko amakipe yakurikiranye:
- Gatenga Gymnastic Club: 86pts
- Vision Jeunesse Nouvelle y’i Rubavu (Hirondele): 76pts,
- Eagle Acrobatic Muhanga: 64pts
- Les Etoiles de l’Acrobatie Bugesera: 60pts
Roben NGABO
UM– USEKE
English