Umunyarwanda wa mbere yabonye License yo gutoza Basketball muri USA

Ishyirahamwe ry’umukino wa Basketball muri Leta zunze ubumwe za Amerika yatanze impamyabumenyi ku batoza mu kiciro cya ‘USA Basketball Gold Coach License’, barimo Yves Nkurunziza umunyarwanda wa mbere ugeze kuri uru rwego.

Nyuma yo kubona abakinnyi bakina muri shampiyona z’amashuri muri zunze ubumwe za Amerika, dushobora no kubona umutoza w’umunyarwanda utoza kuri urwo rwego mu myaka iri imbere.

Yves Nkurunziza yamenyekanye nk’umukinnyi watsinze amanota menshi kurusha abandi muri shampiyona y’u Rwanda ya 2006 ubwo yakinaga muri Cercle Sportif de Kigali yavuyemo 2009 ajya muri Ndejje University yo muri Uganda.

Nyuma yo gusoza gukina, Yves Nkurunziza yatangiye umwuga wo gutoza Basketball ahereye muri St Joseph Kabgayi aho yatwaye igikombe cya ‘interscolaire’ 2011.

Nyuma y’uyu mwaka Nkurunziza yagiye muri Leta zunze ubumwe za Amerika gukomeza amasomo yo gutoza uyu mukino. Ibyo yaharaniye yabigezeho kuko yamaze guhabwa impamyabumenyi ku batoza mu kiciro cya ‘USA Basketball Gold Coach License’.

Uyu mugabo yabwiye Umuseke ko yishimiye cyane kuba umunyarwanda wa mbere ugeze kuri uru rwego.

Nkurunziza yagize ati: “Ubu ndumva ntuje muri njye. Kuko inzozi zanjye ndazikabije nyuma y’igihe nzitegereje. Icyo ngiye gukora ni ugushaka uburyo nsangiza ubu bumenyi bagenzi banjye b’abatoza n’abakinnyi b’abanyarwanda muri rusange”.

Ikigo gifatanya n’ishyirahamwe ry’umukino wa Basketball muri America n’ikigo ‘Enforcement Certification and Approvals Group (ECAG)’ bafatanyije n’abatoza bazwi muri NBA nka; Jay Wright na Don Showalter ubwo hatangwaga impamyabumenyi.

Roben NGABO

UM– USEKE