Kapiteni wa Mukura VS André Mazimpaka agiye muri AS Kigali

Umunyezamu wa Mukura VS André Mazimpaka yamaze kumvikana na AS Kigali. Agiye kuyisinyira imyaka ibiri y’amasezerano kandi yijejwe umwanya wa mbere n’usanzwe atoza abanyezamu bayo Thomas Higiro

AS Kigali iri kugaragaza ingufu nyinshi ku isoko ryo kugura abakinnyi, nyuma yo kubona komite nshya irimo abacuruzi bayobowe na Kanyandekwe Pascal, biteguye gutanga amafaranga ngo ikipe yabo ibone abakinnyi bashobora gutwara igikombe.

Nyuma yo kwifuza no kuganira na benshi barimo Niyonzima Olivier Sefu, Savio Nshuti Dominique na Mugheni Fabrice ba Rayon, Rutanga Eric wa APR FC n’abandi, AS Kigali igiye gutangira gusinyisha.

Kuri uyu wa gatatu tariki 7 Kamena 2017 nibwo André Mazimpaka wari kapiteni wa Mukura VS asinyira AS Kigali nyuma y’ibiganiro bimaze iminsi ine bimuhuza n’ubuyobozi bw’ikipe y’abanyamujyi.

Amakuru agera ku Umuseke yemeza ko uyu mugabo amaze iminsi ine muri Kigali kuko yahageze ku Cyumweru tariki 4 Kamena 2017, aje kumvukana n’ubuyobozi bwa AS Kigali. Ibiganiro byasojwe kuri uyu wa kabiri yemeye gusinya imyaka ibiri agahabwa ‘recrutement’ ya miliyoni eshatu n’igice n’umushahara w’ibihumbi 350.

Uyu munyeza bivugwa ko umutoza w’abanyezamu wa AS Kigali n’ikipe y’igihugu Amavubi Thomas Higiro yamwijeje umwanya ubanzamo muri iyi kipe nshya kuko Bate Shamiru na Ndoli Jean Claude bari basanzwe batitwaye neza mu mwaka ushize w’imikino.

Roben NGABO

UM– USEKE