Cancer ni indwara nk’izindi…Na Malaria utivuje kare iraguhitana-Uvura Cancer

Ibitaro bya Butaro ni bimwe mu bitaro bizwi mu kuvura indwara ya Cancer muri aka karere, bamwe mu barwayi b’iyi ndwara baje kuhivuriza barakize. Dr. Deogratias Ruhangaza ni umuganga muri ibi bitaro ushinzwe ibijyanye no gusuzuma indwara ya Cancer avuga ko iyi ndwara ari kimwe n’izindi kuko iyo uyirwaye ayifatiranye akivuza kare akira, ayigereranya na Malaria kuko na yo ishobora guhitana uyirwaye iyo ayitindanye.

Mu kiganiro kihariye yagiranye n’Umuseke, Dr Deogratias Ruhangaza yavuze ko ubwoko bwa Cancer buza kw’isonga mu zo basangana abo basuzuma ari iy’amabere y’abagore, iy’inkondo y’umura, maze na Cancer yo mu maraso bakunze gusangana abana.

Avuga ko bakira ababwayi batandukanye biganjemo abaturuka mu karere ka Burera gaherereyemo ibi bitaro n’abaturuka mu bitaro bibohereza kwivuriza aha, abandi baturuka hanze y’u Rwanda.

Gusa ngo abenshi baza uburwayi bwaramaze kubarenga ku buryo kubavura biba bigoye. Ati “ Iyo bigeze kuri urwo rwego amahirwe yo gukira aba ari macye cyane.”

Benshi bazi ko iyi ndwara itavurwa ngo ikire. Gusa Dr Deogracias Ruhangaza amara impungenge abafite imyumvire nk’iyi kuri Cancer.

Ati “ Cancer ni indwara nk’izindi, uyifatiranye hakiri kare ushobora kuvurwa ugakira  ibyo ni byo abantu bakwiye kumenya kubera ko na malaria ubwabyo iyo utivuje ukaguma mu rugo yaguhitana, rero  na Cancer na yo ni uko.”

Dr. Deogratias avuga ko  umwihariko ya cancer ari uko uburwayi butababaza uyirwaye ku buryo yihutira kujya kwa muganga.

Avuga ko Cancer iguma mu mubiri igihe kinini ikagenda ikura buhoro buhoro ku buryo iyo igeze aho ibabaza umuntu iba igeze ku rwego rukabije, agasaba abantu kujya bisuzumisha iyi ndwara kugira ngo nibasanga barayanduye bivuze hakiri kare.

Mukeshimana Cancilida waturutse mu karere ka Huye aje kuvuza umwana we w’imyaka 10 urwaye Cancer, avuga ko uyu mwana yafashwe ataka ko aribwa urubavu.

Uyu mubyeyi avuga ko babanje kugana ibtaro bya Kaminuza y’u Rwanda I Butare (CHUB) byaje kumwohereza mu bitaro bya Gisirikare I Kanombe bagacisha mu cyuma uyu mwana bagasanga afite ikibyimba mu gatuza agahita yoherezwa muri ibi bitaro bya Butaro.

Mukeshimana ugendera ku kizere yahawe n’abaganga bari gukurikirana umwana we, avuga ko abarwayi ba Cancer muri ibi bitaro bitabwaho ku buryo abaje kwivuza kare baba bafite amahiwe yo gukira.

Cancer y’amaraso ni imihindukire y’uturemangingo tw’amaraso

Dr. Deogratias avuga ko ko Cancer y’amaraso iterwa n’imihindukire y’uturemangingo tw’amaraso tuba twatangiye gukura mu buryo budasanzwe.

Avuga ko hari ubwoko bwa Cancer bwakwirindwa, kuko hari bimwe bizwi ko bitera bumwe mu bwoko bw’iyi ndwara.

Ati “ Ibitera Cancer bizwi birahari,  nk’abantu banywa itabi cyane, inganda zikoresha abantu ibintu biri Chimique (uburozi) nabyo  bishobora kubatera uburwayi bwa Cancer baramutse batikingiye, ibi ni bimwe hari n’ibindi byinshi cyane.”

Umwaka ushize wa 2016 ibitaro bya Butaro byakiriye ibizamini bigera ku 1 610, abagera kuri 570 basanganywe uburwayi bwa Cancer.

Ibi bitaro kandi byakira abarwayi ba Cancer baturutse mu bihugu by’ibituranyi nka Uganda, Repubulika Iharanira Demokarasi ya Congo n’abaturuka mu Burundi.

Muri 2012 ibi bitaro byari bifite imashini ebyiri zifashishwa mu bikorwa by’ubuvuzi bw’indwara ya Cancer, uko iminsi yagiye ishira izi mashini bakomeje kuzongera, ubu bamaze kugira imashini 11 zitunganya ibizamini.

Photos © D. S. Rubangura/Umuseke.rw

Daddy SADIKI RUBANGURA
UM– USEKE.RW