Lt Gen Ibingira avuga ko umurongo mwiza w’ingabo ziwukomora kuri Perezida

Rutsiro- Mu muhango wo gutangiza icyumweru cyahariwe ibikorwa by’ingabo z’u Rwanda (Army Week) mu ntara y’u Burengerazuba, Lt Gen Fred Ibingira yavuze ko ingabo z’u Rwanda zizakomeza guharanira icyateza imbere imibereho y’abaturage kuko umugaba w’ikirenga wazo Perezida Paul Kagame ahora abibakangurira.

Abaturage babanje gufatanya n’ingabo mu bikorwa by’ubuhinzi mu gishanga cya Bitenga kingana na hegitari 69 kiri hagati y’imirernge ya Bitenga na Ruhango, baje kugirana ibiganiro n’ingabo z’u Rwanda na bamwe mu bayobozi mu nzego za gisivile bari baje kwifatanya nabo.

Lt Gen Fred Ibingira yavuze ko ibi bikorwa by’ingabo z’u Rwanda zifite aho zibivoma kuko umugaba w’ikirenge wazo ahora azigira inama zubaka. Ati ” Perezida wa repubulika yavuze ko tugomba kuba ishingiro ry’impinduramatwara n’iterambere.”

Avuga ko ingabo z’u Rwanda zidateze kuzawutezukahouyu murongo mwiza wo gushakira ineza abaturage kuko biri mu ntego zayo.

Lt Gen Fred Ibingira avuga ko igisirikare cy’u Rwanda kizakomeza gucunga umutekano w’abanyagihugu ariko kikanaharanira ko abaturage babone iby’ibanze bakenera mu buzima birimo amashuri n’ibindi bikorwa remezo.

Minisitiri w’ubuhinzi n’ubworozi madamu Gelardine Mukeshimana wari uhagarariye Guverinoma muri uyu muhango yavuze ko nka leta bashimira ingabo z’u Rwanda uruhare zigira mu guteza imbere igihugu by’umwihariko umwete zihora zigaragaza mu gushakira Abanyarwanda ubuzima bwiza.

Muri iki cyumweru cyahariwe ibikorwa by’ingabo, hateganyijwe ibikorwa byo kuzamura imibereho y’abaturage birimo ibyo guhanga n’inzara yugarije aka karere ka Rutsiro.

Minisitiri w’Ubuhinzi n’ubworozi yasabye abaturage yasabye abaturage kubungabunga ibyagezweho kuko ari byo bizabafasha kugera ku bindi bifuza.

Yijeje Abanya-Rutsiro ko gutunganya iki gishanga cyatangirijwemo ibikorwa bya ‘Army Week’ bizatuma umusaruro babonaga wiyongera bityo bagakomza kwizamura.

KAGAME KABERUKA  Alain
UM– USEKE.RW/Rutsiro