Wa mugore wapimaga ibilo 500 amaze guta 250Kg

Umunya-Egypt Eman Ahmed Abd El Aty wafatwaga nk’umugore ufite ibilo byinshi ku Isi, mu kwezi gushize yarabazwe ahita ata ibilo 100, abaganga bamukurikirana baratangaza ko nyuma y’ukwezi kumwe abazwe ubu amaze guta ibilo 250.

Eman Ahmed Abd El Aty w’imyaka 36 wari ufite ibilo bisaga 500 yajyanywe mu bitaro y’I Mumbai mu Buhindi kugira ngo abagwe kubera uyu mubyibuho ukabije wari waramubujije amahwemo.

Muri Werurwe uyu mugore yari yabazwe ahita ata ibilo 100, abaganga bahise batangaza ko hari ikizere ko ibilo bye bizakomeza kugabanuka.

Ubuyobozi bw’ibi bitalo biri gukurikirana Eman Ahmed bwashyize hanze ifoto igaragaza uyu mugore ko asigaye abasha kwicara, bunavuga ko amaze guta ibilo 250.

Ibi bitaro bigira biti “ Aragaragara nk’uwishikimiye kunanuka kwe, ubu arabasha kugendera mu ntebe kandi ashobora kwicara umwanya munini, ibintu tutatekerezaga ko byashoboka mu mezi atatu ashize.”

Abaganga bariho bakurikirana Eman Ahmed, nyuma yo kumubaga bakomeje kumwitaho bamuha imiti yo kuringaniza ibilo.

Aba baganga kandi bavuga ko ikindi bakoze ari ukumufasha kuboneza imirire no kumugenera ibyo kunywa byose bimufasha kugabanya ibinure mu mubiri.

Ibitangazamakuru byakunze kuvuga kuri uyu mugore, byavugaga ko yamaze imyaka 25 atava mu nzu kubera uyu mubyibuho we udasanzwe.

UM– USEKE.RW