Peace Cup: Rayon yanyagiye Rugende FC 9-0, birimo bitatu bya Shasir

Mu mukino wa mbere w’igikombe cy’Amahoro kuri Rayon sports yatwaye icy’umwaka ushize, inyagiye Rugende Football Club yo mu kiciro cya kabiri ibitego 9 – 0 birimo ‘Hatrick’ ya Nahimana Shasir wari umaze igihe adakina kubera imvune.

Stade Regional ya Kigali iri i Nyamirambo niyo Rugende FC yakiriyeho Rayon sports mu mukino utitabiriwe n’abafana benshi.

Tidiane Kone yafunguye amazamu ku munota wa 14 w’umukino, ku kazi gakomeye kari gakozwe na Nsengiyumva Moustapha wakinaga uruhande rwose rw’iburyo (right wing-back).

Nyuma yo kubona iki gitego Rayon sports yakomeje gusatira no kotsa igitutu ubwugarizi bwa Rugende FC yo mu kiciro cya kabiri bivamo penaliti ku munota wa 21 ku ikosa ryakorewe Tidiane Kone.

Penaliti yatewe na Lomami Frank arayinjiza kiba igitegi cya mbere atsindiye Rayon sports muri uyu mwaka w’imikino.

Ku munota wa 37 Nahimana Shasir yahawe umupira na Muhire Kevin nawe atsinda igitego cya gatatu cya Rayon sports nyuma y’ukwezi yari amaze adakina.

Mbere y’uko igice cya mbere kirangira Lomami Frank yatsinze igitego cya kane ku mupira yahinduriwe na Nsengiyumva Moustapha.

Mu munota umwe gusa wongeweho Rayon Sports yabonye Coup franc Ange Mutsinzi atsinda igitego cy’ishoti bituma igice cya mbere ari 5-0.

Nyuma y’iminota ibiri igice cya kabiri gitangiye Tidiane Kone yazamukanye umupira yihuta, awuhinduye imbere y’izamu myugariro Jean Pierre wa Rugende aritsinda.

Masudi Djuma yakoze impinduka yongeramo amaraso mashya, Nizeyimana Idrissa yafashe umwanya wa Mugisha Francois Master, Nova Bayama asimbura Abouba Sibomana.

Byatumye Rayon sports ikomeza gusatira, ibona ibindi bitego bitatu byatsinzwe na Idrissa na Nahimana Shasir watsinze bibiri mu gice cya kabiri.

Uyu mukino warangiye Rayon sports itsinze Rugende FC ibitego 9-0 ubaye iminsi itatu gusa mbere yo kwakira Rivers United yo muri Nigeria muri CAF Confederation Cup 2017.

Roben NGABO
UM– USEKE.RW