APR FC itsinze Vision FC 3-0, Mwiseneza Djamar atsinda nyuma y’imyaka ibiri

Roben Ngabo
04/18/2017

Mwiseneza Djamar watsinze igitego cya gatatu cya APR FC yari amaze imyaka itatu adatsinda

Amakipe yo mu kiciro cya mbere mu mupira w’amaguru w’u Rwanda yatangiye gukina igikombe cy’Amahoro 2017. APR FC yatangiye neza itsinda Vision FC 3-0, birimo icya Mwiseneza Djamar wari umaze imyaka ibiri adatsinda.

Ikipe y’ingabo z’u Rwanda APR FC yatangiye urugendo rwo gushaka igikombe cy’Amahoro kuri uyu wa kabiri tariki 18 Mata 2017. Yakinnye na Vision FC umukino ubanza wabereye kuri stade Umumena.

Ni umukino Jimmy Mulisa utoza APR FC yari akeneye intsinzi kuko yifuza igikombe cy’amahoro kuko amahirwe yo kwisubiza icya shampiyona y’u Rwanda ari make kuko arushwa na Rayon sports iyoboye urutonde amanota umunani (Rayon ifite n’ikirarane).

Nubwo yabanje mu kibuga bamwe mu bakinnyi badasanzwe babona umwanya, yabonye umusaruro kuko ku munota 23 yari yafunguye amazamu ku gitego cya Sekamana Maxime ku mupira yahawe na Onesme Twizerimana.

Mbere yo kurangiza igice cya mbere APR FC yabonye igitego cya kabiri cya Twizerimana Onesme warengeje umupira umunyezamu wa Vision FC Ndahiro Patrick byatumye igice cya mbere kirangira ari 2-0.

Mu gice cya kabiri APR FC yagarukanye intego yo gusatira no gushaka ibindi bitego kuko yahise inasimbuza, Nshuti Innocent asimbura Onesme Twizerimana, Mucyo Fred Januzaj asimbura Benedata Janvier naho Mwiseneza Djamar afata umwanya wa Fiston Nkinzingabo.

Yakomeje kubona uburyo bushobora kubyara igitego ariko inshuro eshatu amahirwe apfushwa ubusa na Innocent Nshuti wagiyemo asimbuye.

Habura iminota itatu ngo umukino urangire Mwiseneza Djamar yatsindiye APR FC igitego cya gatatu ku mupira yahawe na Ngabo Albert wakinaga nka myugariro w’iburyo. Uyu mugabo APR FC yakuye muri Rayon ashyira akadomo ku myaka ibiri yari amaze adatsinda mu mikino y’amarushanwa kuko abiheruka tariki 8 Gashyantare 2015 ubwo ikipe ye yatsindaga Etincelles FC.

Imikino y’igikombe cy’Amahoro

Kuwa kabiri tariki 18 Mata 2017